OQO-da «RIC ON KO'RME» atty aptalyq jármeńke bastaý aldy
ASTANA. QazAqparat - Ońtústik Qazaqstanda «RIC ON KO'RME» atty aptalyq jármeńke bastaý aldy. Alǵash ret uıymdastyrlyp otyrǵan jobaǵa «OŃTÚSTІK» aımaqtyq ınvestıtsııalyq ortalyǵy jáne «Yrys» mıkroqarjy uıymy muryndyq bolyp otyr, dep habarlaıdy oblystyq ákimdiktiń baspasóz qyzmeti.
Otandyq ónimdi qoldaý jáne baǵany turaqtandyrý maqsatynda uıymdastyrylǵan sharanyń saltanatty ashylý rásimine Ońtústik Qazaqstan oblysynyń ákimi Janseıit Túımebaev qatysty. Taýar óndirýshi mekemelerdiń ónimderimen tanysqan óńir basshysy, kásipkerlerdiń jumysyna sáttilik tilep, osy qalyptan taıynbaı eńbek etýge shaqyrdy.
«Endi osyndaı úlgide úlken kórme uıymdastyrý qajet. «OŃTÚSTІK» AIO jáne «Yrys» mıkroqarjy uıymynyń aýdandarda da qarjylandyrǵan jobalary kóp. Sondyqtan ár aýdanda osyndaı jármeńke uıymdastyrý kerek. Bolashaqta mundaı jármeńke turaqty ótkizilip tursa, áleýmettik bazarlar qalyptasady. Osylaısha biz baǵalardy arzandatý jáne turaqtandyrýǵa qol jetkizemiz», - dedi J. Túımebaev.
Óz kezeginde jármeńkeni uıymdastyrǵan «OŃTÚSTІK» aımaqtyq ınvestıtsııalyq ortalyǵynyń Basqarma tóraǵasy Qýanysh Baıtóre kompanııa halyqqa qoldaý kórsetýge ár qashan da daıyn ekendigin jetkizdi. Sondaı-aq, atalǵan jármeńke ár senbi saıyn dástúrli túrde jalǵasatynyn aıtty. «Biz tek qana qarjy ınstıtýty emespiz, bizdiń kompanııa damý ınstıtýty bolyp esepteledi. Sondyqtan, biz kásipkerlerge tek qarjy berip qana qoımaı, olardyń kásibin ári qaraı ilgeriletýge jáne damytýǵa barynsha qoldaý kórsetemiz. Olar bizben, biz olarmen birge ósemiz», - dedi Q. Baıtóre.
Jármeńkege «Maksımým» JShS aımaqtyq ınvestıtsııalyq ortalyǵynan jeńildetilgen nesıe alyp, kásibin júrgizgen 40-qa jýyq kásipker qatysyp, halyqqa otandyq ónimderin tómen baǵada usyndy. Olardyń qatarynda balyq jáne shujyq, jemis-jıdek, kókónister, et jáne sút ónimderi bar. Odan bólek, jeńil ónerkásiptik taýarlar, qoldan jasalǵan buıymdar, qurylys materıaldary, sondaı-aq balalar úshin oıynshyqtardy da tabýǵa bolady.
Jármeńkeniń saltanatty ashylý rásiminde balalar úshin oıyn-saýyqtar, jáne ulttyq oıyndar uıymdastyrylyp, halyqqa palaý taratyldy. Bir buryshta jármeńkege qoıylǵan etterden barbekıý pisirilip, halyqtyń bergen baǵasy arqyly eń dámdi et anyqtaldy.
Aıta ketý kerek, atalmysh shara Elbasymyzdyń halyqqa joldaýy, rýhanı jańǵyrý aıasynda qolǵa alynyp, basqa da uıymdarǵa áleýmettik sharalardy ótkizýdi nasıhattaýdy kózdeıdi. Sondaı-aq, kompanııanyń «RIC ON KO'RME» ataýy arqyly latyn álipbıine kóshýdi qoldaıtynyn kórsetti.
