OQO-da respýblıkalyq qyzǵaldaq festıvali ótti
ShYMKENT. QazAqparat - Ońtústik Qazaqstan oblysy Túlkibas aýdanynda «Aqsý-Jabaǵyly alaýy, Shubaıqyzyl jalaýy» atty Respýblıkalyq qyzǵaldaq festıvali ótti, dep habarlaıdy QazAqparat tilshisi.
Festıvalge OQO ákimi Janseıit Túımebaev, máslıhat depýtattary, oblys ardagerleri, zııaly qaýym ókilderi men úkimettik emes uıymdar jáne týrızm salasyndaǵy kásipkerler men týrısttik kompanııalar, sheteldik qonaqtar, qylqalam sheberleri jáne fotosýretshiler, aqyndar jáne jastar qatysýda.
Elbasynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasy aıasynda ótkizilip otyrǵan is-shara jastardy tabıǵatty aıalap qorǵaýǵa shaqyrý arqyly jańa qazaqstandyq patrıotızmge tárbıeleýge belsene atsalysý maqsatynda ótkizilip otyr.
Festıvaldiń ashylý saltanatynda sóz alǵan oblys ákimi eń ádemi qyzǵaldaqtardyń Aqsý-Jabaǵylyda jáne Shubaıqyzyl atalatyn teńdesi joq tóbede ósetinin atap ótti.
«Shubaıqyzyl shoqysy elimizdiń «Qyzyl kitabyna» engizilgen greıg qyzǵaldaǵy eń kóp ósetin aýmaq. Bul qyzǵaldaqtar Qazyǵurt, Tólebı, Báıdibek óńirlerindegi taýly aýmaqtarda kezdesedi. Qyzǵaldaq gúli qazaq halqynyń túsiniginde - kóktemniń, jańa ómirdiń, kórikti tirshiliktiń jarshysy bolyp esepteledi. Osyndaı ásem tabıǵatty aıalap, týǵan jerdi qadirleý barshamyzdyń mindetimiz. Sondyqtan da bıyldan bastap ár aımaqta qoǵamdyq sanany jan-jaqty jáne túbegeıli jańǵyrtýǵa baǵyttalǵan «Rýhanı jańǵyrý» baǵdarlamasy aıasynda aýqymdy sharalar ótkizý jáne olardy dástúrge aınaldyrý kózdelip otyr», - dedi ákim.
«Tekti tórim - Túlkibasym» teatrlandyrylǵan horeografııalyq qoıylymmen bastaý alǵan is-sharada «Shuraılym - Shubaıqyzylym» jas qalamgerler baıqaýynyń jeńimpazdary marapattalyp, kórermenderge arnalǵan kontserttik baǵdarlamamen ulasty.
Shara barysynda jastarǵa «Shubaıqyzyl shoqysynyń» tarıhy jaıly maǵlumat berilip, jas aqyndardyń óleńderi oqylyp, tabıǵat taqyrybynda kórme men jas sýretshilerdiń sýret baıqaýy ótkizildi. Atalǵan is-sharaǵa 5000 adam qatysty.
Sonymen birge kelýshiler qylqalam jáne fotosýretshilerdiń kórmesi men memlekettik tabıǵı parkter sherýin tamashalady.
