OQO-da prokýrorlar jasóspirimder arasynda qylmyspen kúresti kúsheıtti

ShYMKENT. QazAqparat - Ońtústik Qazaqstan oblysy Saryaǵash aýdanynda prokýrorlar jasóspirimder arasynda qylmyspen kúresti kúsheıtti. Sebebi, halqy tyǵyz ornalasqan aýdanda oqýshylardan aqsha bopsalaý, kúsh kórsetý sııaqty derekter jıilep ketken, - dep habarlaıdy QazAqparat HAA tilshisi.

Prokýrorlardyń sózinshe, bir ǵana Saryaǵash aýdanynda jyl basynan beri jasóspirimdermen 7 qylmys jasaý, ıaǵnı bótenniń múlkin jasyryn jymqyrý faktisi anyqtaldy. Kámeletke tolmaǵandardyń quqyqtaryn qorǵaý maqsatynda júrgizilgen tekserý barysynda 23 zańbuzýshylyq derekteri anyqtalyp, 245 jasóspirimniń quqyqtary qorǵalǵan. 21 tulǵa jaýapkershilikke tartyldy. Osyǵan oraı aýdanynyń qadaǵalaý organy  ókilderi arnaıy mobıldi top quryp, onyń quramyna prokýrorlar men bilim bóliminiń qyzmetkerleri qatystyrylyp otyr. Aınalasy eki aıdyń ishinde top aýdandaǵy mektepterdi túgel aralap shyqty.

«Aýdan boıynsha 142 bilim oshaǵy bar. Onda myńdaǵan oqýshy tálim alady. Olardyń barlyǵyn túgel jınap, basyn qosý múmkin bolmaǵandyqtan, biz ustaz, ata-analarmen qatar mektep belsendileriniń basyn qostyq.  Onda oqýshylar qylmystyń aldyn alý barysynda óz oılaryn ortaǵa saldy», - deıdi aýdan prokýrory Nurjan Boranbaev.

Sońǵy kezde mektepterde álimjettik, aqsha jınaý jaıttary jıilegen. Búginginiń balalary, sondaı-aq, buzaqylyq, urlyq, alaıaqtyq jasaýǵa úıir. Al zań boıynsha, mektep oqýshysy qylmys jasaǵanymen, 14 jasqa deıin olarǵa eshqandaı jaza qoldanylmaıdy. Osydan baryp, balalar arasyndaǵy qylmysty aýyzdyqtaý qıyn bolyp turǵan kórinedi. Endi mobıldik top osy baǵytta profılaktıkalyq jumystardy júrgizetin bolady.