OQO-da prokýrorlar men veterınarlar reıd júrgizdi
«Mal urlyǵyna tosqaýyl» jobasy aıasynda júrgizilgen shara barysynda óńirdegi eń úlken mal bazarlary tekserilip, tórt túlik tıelgen kólikter baqylaýdan ótkizildi.
Mal urlyǵyna tosqaýyl bolýǵa ózge de quzyrly organ qyzmetkerleri tartyldy. Reıd barysynda mal bazarlaryna bet alǵan kólikter toqtatylyp, qujattary tekserildi. Tıelgen maldardyń kimge tıesili ekeni anyqtaldy. Arnaıy veterınarııalyq qujattaryn kórsete almaǵan azamattardyń kólikteri arnaıy oqshaýlaý ornyna áketildi.
«Qarabulaq aýylyndaǵy mal bazarǵa ákele jatqan 16 sıyr men jylqy, 75 qoı jáne 13 eshkiniń mal dárigerlik anyqtamalary, ózge de qujattary bolmady. Maldary syrǵalanbaǵan. Munyń bári zańsyz áreketter», - deıdi oblystyq aýylsharýashylyǵy basqarmasynyń bas mamany Bekzat Tasbolov.
Aıta keteıik, mal urlyǵyna tosqaýyl jobasyn qolǵa alǵan prokýrorlar mundaı reıdtik sharalardy ótken jyldan beri júrgizýde. Osylaısha qoldy bolǵan tórttúlikterdi anyqtap, óz ıelerine qaıtaryp jatyr.