OQO-da prokýrorlar alıment ala almaı júrgen analardy quttyqtady
«Alıment tólemeýge qarsy 30 qadam» jobasynyń aıasynda uıymdastyrylǵan is-sharaǵa aýdan ákimdigi, máslıhat depýtattary men ishki ister basqarmasynyń basshylary da arnaıy shaqyryldy. Sonymen qatar jıynǵa aýdandyq Memlekettik kirister basqarmasy, aýdandyq ishki saıasat bólimi qyzmetkerleri, aýdandyq memlekettik jáne jeke oryndaýshylary, jumyspen qamtý jáne áleýmettik baǵdarlamalar bólimi men jumyspen qamtý ortalyǵynyń ókilderi, qoǵamdyq birlesitik músheleri qatysty.
Kópshiliktiń basyn qosqan sharada qadaǵalaýshy organ ókilderi alıment óndirýshi azamatshalarǵa Qazaqstan Respýblıkasynyń «Atqarýshylyq is júrgizý jáne sot oryndaýshylardyń mártebesi týraly» Zańynyń, Qazaqstan Respýblıkasynyń Eńbek kodeksiniń, Azamattyq jáne Qylmystyq kodeksteriniń talaptaryn túsindirdi.
Basqosýda sondaı-aq boryshkerlermen alımentti az tóleý maqsatynda jeke kásipker nemese sharýa qojalyqtaryna jumysqa ornalasyp, bolmashy aılyq jalaqysy jónindegi anyqtamany sot oryndaýshylaryna usyný derekteri oryn alyp otyrǵany sóz boldy. Ajyrasqan erli-zaıyptylar arasynda ortaq múlikti bólip alýǵa qatysty jáne uzaq merzimder boıy tólenbeı kele jatqan alımentterdi óndirýge qandaı sharalar kórýge bolatyndyǵy jóninde zań talaptary sóz boldy.
«Búgin osy sharada shaǵymyn aıtqan azamatshalardyń aty-jónderiniń tizimi jasalyp, kótergen ýájderi boıynsha atqarýshylyq is-júrgizý óndiristerin tekserý aýdandyq prokýratýranyń baqylaýyna alyndy. Qajet bolǵan jaǵdaıda prokýratýra tarapynan sizderge zań talaptary túsindirilip, quqyqtyq keńester beriledi»,-dedi Saryaǵash aýdanynyń prokýrory Nurjan Boranbaev.
Jıyndy qorytyndylaǵan qadaǵalaý organy ókilderi aıaýly analardy 8 naýryz merekesimen quttyqtap, olarǵa syılyqtar tabystady. Taǵdyrdyń jazýymen perzentterin jalǵyz ózderi tárbıelep júrgen názikjandylarǵa kontserttik baǵdarlama qoıyldy.
