OQO-da polıtseılerge qarsylyq kórsetken 3 adam ustaldy
ShYMKENT. QazAqparat - Ońtústik Qazaqstan oblysynda polıtsııa qyzmetkerlerine qarsylyq kórsetken úsh turǵy ustaldy. Jol erejesin buzǵandar tártip saqshylaryna baǵynǵysy kelmegen, dep habarlaıdy QazAqparat tilshisi.
Saıram aýdandyq ishki ister basqarmasynyń kezekshi bólimine jol patrýldik polıtsııa ekıpajy qyzmetkerlerinen habarlama túsken. Olardyń aıtýynsha, jol erejesin buzǵandar ishki ister qyzmetkerlerine baǵynǵysy kelmeı, kúsh kórsetken. Belgili bolǵandaı, Jergilikti polıtsııa qyzmetkerleri Qaramurt aýyly mańynda júrip, jol erejesin buzǵan «Mersedes» kóligin toqtatqan. Alaıda kólik júrgizýshisi toqtamastan, jasyrynyp qalýǵa tyrysady. Tártip saqshylary kólikti toqtatqanymen ondaǵy eki jolaýshy qarsylyq kórsetken. Oqıǵa ornyna jetken polıtseıler 29 jastaǵy júrgizýshi men janyndaǵy ekeýdi de polıtsııa bólimshesine jetkizgen. 
Qazir ustalǵandardyń ústinen Qylmystyq kodekstiń 380-baby «Bılik ókiline qatysty kúsh qoldaný» boıynsha is qozǵaldy. Saıram aýdanynyń 1981, 1988, 1987 jyly týǵan úsh turǵyny ýaqytsha ustaý abaqtysyna qamalyp, tergeý amaldary júrgizilýde.
Jyl basynan beri atalǵan aýdanda bılik ókilderine qatysty kúsh qoldaný boıynsha 5 qylmystyq is qozǵalyp, sotqa joldanǵan.
