OQO-da polıtseılerdi soqqyǵa jyqqan eki turǵynnyń isi sotta qaralýda
ShYMKENT. QazAqparat - Ońtústik Qazaqstan oblysynyń Ordabasy aýdanynda eki turǵyn polıtsııa qyzmetkerlerin uryp-soǵyp, pogonyn julǵan. Qazir tártip saqshylaryn soqqyǵa jyqqandardyń qylmystyq isi aýdandyq sotta qaralýda, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, keleńsiz jaǵdaı Ordabasy aýdanynda bolǵan.
Tártip saqshylary jedel profılaktıkalyq is-sharasyn júrgizý barysynda dámhanalardyń birinen ózbekstandyq azamattardy baıqap, zańǵa sáıkes qujattaryn kórsetýdi talap etken. Alaıda, olardyń qujattary joq bolyp shyǵady. Sol kezde tamaqtaný ornynan belgisiz eki azamat shyǵyp, biri polıtsııa qyzmetkerin soqqyǵa jyqqan. Al, ekinshi polıtseı olardy ajyratpaq bolǵan kezde, turǵyndar ony da uryp-soǵady. Tipti jurttyń kózinshe pogonyn jyrtyp, bılik ókilderin qorlaǵan. Osy sátti paıdalanǵan kórshi eldiń azamattary sol jerden boı tasalaǵan.
«Polıtsııa qyzmetkerlerin soqqyǵa jyqqan eki turǵyn ustalyp, qamaýǵa alynǵan. Olarǵa qatysty Qylmystyq kodekstiń «Bılik ókilin qorlaý» jáne «Bılik ókiline qatysty kúsh qoldaný» baptary boıynsha sotqa deıingi tergeý amaldary júrgizildi. Olar sol kúni sottyń sanktsııasymen 2 aıǵa qamaýǵa alyndy. Qazirgi tańda is sotta qaralyp jatyr» delingen habarlamada.
Osy oqıǵadan keıin kúdiktilerdiń týystary eki polıtsııa qyzmetkeriniń is-áreketine narazylyq bildirip, oblystyq Іshki ister departamentine «bılikti nemese laýazymdyq ókilettikterdi asyra paıdalandy» dep aryz túsirgen. Alaıda departamenttiń Ózindik qaýipsizdik basqarmasy tarapynan jan-jaqty tekserý jumystary júrgizilip, polıtsııa qyzmetkerlerine qatysty kórsetilgen jaıttar óz dálelin tappaǵan. Quramynda qylmystyq quqyqbuzýshylyqtyń bolmaýyna baılanysty ishki ister organdary qyzmetkerlerine qatysty qylmystyq is toqtatyldy.
