OQO-da polıtseıler demalýshylarǵa Qyzyl kitapqa engen qyzǵaldaqtardy julýǵa bolmaıtynyn eskertti
ShYMKENT. QazAqparat - Ońtústik Qazaqstan oblysynda jer qoınaýyn zańsyz paıdalanýdyń aldyn-alý maqsatynda júrgizip otyrǵan is-sharalar barysynda, Báıdibek aýdanynda 1 qylmys anyqtaldy.
Oblystyq ІІD Jergilikti polıtsııa qyzmetiniń habarlaýynsha, Báıdibek aýdany Bógen ózeniniń boıynan zańsyz qum-tas qazyp jatqan 2 júk artý tehnıkasy jáne markasy «Kamaz» júk kóligi anyqtalyp, tehnıkalar aqyly aıypturaqqa jetkizildi. Al tabıǵatty zańsyz paıdalanǵan 1989, 1974 jáne 1971 jylǵy Báıdibek jáne Saıram aýdany turǵyndardyń ústinen QR QK-niń «Jer qoınaýyn óz betinshe paıdalaný» 334-baby boıynsha qylmystyq is qozǵaldy. Sotqa deıingi tergeý amaldary júrgizilýde.
Sonymen qatar, sol kúni jergilikti polıtseılermen Báıdibek aýdanynyń aýmaǵynda sırek kezdesetin jáne tez azaıyp, quryp ketý qaýpi tóngen ósimdikter sanatynda QR-nyń Qyzyl kitabyna engizilgen «Greıg» jáne «Kaýfman» qyzǵaldaqtaryn zańsyz julýdyń jolyn kesý maqsatynda aldyn-alý is-sharalary júrgizildi.
Qýantatyn jaǵdaı, is-shara barysynda eshqandaı zańbuzýshylyq, ıaǵnı «Greıg» jáne «Kaýfman» qyzǵaldaqtaryn julý, satý derekteri anyqtalmady.
Al, tabıǵat aıasynda demalyp júrgen azamattarǵa tártip saqshylary qyzǵaldyqtardyń Qyzyl kitapqa engizilgeni, erekshe qorǵalatyn ósimdikter qataryna jatatyndyǵy jáne julýǵa nemese olarǵa qatysty basqa da zańsyz is-áreketter jasaý zańmen belgilengen qylmystyq jaýapkershilikke ákep soqtyratyndyǵy týraly túsindirý jumystaryn júrgizdi. Sondaı-aq, tártip saqshylary daıyndaǵan eskertpe paraqtary taratyldy.
