OQO-da polıtseıler bastaryn qaterge tigip, qarýly qylmyskerdi ustady
ShYMKENT. QazAqparat - Ońtústik Qazaqstan oblysynyń polıtseıleri bastaryn qaterge tige otyryp, qylmystyq jazadan qashyp júrgen qarýlanǵan qylmyskerdi ustady, dep habarlaıdy QazAqparat tilshisi.
Kentaý polıtsııa bólimine sońǵy úsh jyl qatarynan jergilikti turǵyndardan túsken aryzdar tıylmaǵan. Onda aryzdanýshylar úılerinen altyn buıymdary men baǵaly zattary jıi urlanatynyn aıtypty. Al jeke úılerden maldaryn urlaný jaǵdaıy jıilegen. Osydan keıin naqty sharalarǵa kóshken tártip saqshylary izdestirý jumystaryn júrgizip, osy qylmystarǵa qatysy bar degen 8 kúdiktini qolǵa túsirdi. Ustalǵandardyń tulǵalaryn anyqtaý barysynda 1993, 1994, 1995, 1996 jyly týǵan jergilikti jerdiń turǵyndary ekeni belgili boldy. Al, uıymdasqan qylmystyq toptyń basshysy Elemes Sábıt sol kezde qashyp ketken bolatyn. Jedel izkesýshiler kúdiktilerden urlanǵan zattardyń bir bóligin tárkilep aldy. Tergeý barysynda olardyń páter urlyǵynyń 24 jaıtyna qatystylyǵy anyqtaldy. Bul qylmystyq toptyń jábirlenýshilerge keltirilgen jalpy shyǵyn kólemi mıllıon teńgege jýyq bolyp otyr. Maýsym aıynda Elemestiń qylmystyq tobynyń barlyq músheleri ártúrli jazaǵa tartyldy. Al Elemestiń ózine Kentaý QІІB-niń qyzmetkerleri izdeý jarııalady.
Arada tórt aı ótken soń jedel-izdestirý is-sharalarynyń nátıjesinde QІІB Krımınaldy polıtsııa qyzmetkerleri izdeýde júrgen Elemestiń qazirgi júrgen jerin anyqtady. Osydan keıin Almaty qalasyna qylmyskerdi ustap ákelý úshin krımınaldy polıtsııanyń jedel izkesýshileri Samat Býharbaev pen Ernar Anarbaev jiberildi. Alyp shaharda túngi 23.00 shamasynda izdeýde júrgen Elemesti ustaý operatsııasy júrgiziledi. Alaıda qylmystyq toptyń jetekshisi polıtseılerge belsendi túrde qarsylyq kórsetip, tártip saqshylaryna eki ret travmatıkalyq qarýdan oq atqan. 27 jastaǵy polıtsııa kapıtany Anarbaev alǵan jaraqatyna qaramastan, qylmyskerdiń qolyna kisen salyp, kómekke kelgen «Boran» ekıpajyna tapsyrǵan.
Qazirgi tańda izdeýde júrgen Sábıt Elemes Almaty q. ІІD ýaqytsha ustaý oqshaýlaǵyshynda qamaýda otyr. Onyń ústinen Áýezov aýdandyq polıtsııa bólimimen Qylmystyq kodekstiń 287 «Zańsyz qarýdy ıemdený, saqtaý jáne tasymaldaý», 293 «Buzaqylyq », 380 «Bılik ókiline qatysty kúsh qoldaný» baptary boıynsha is qozǵalyp, sotqa deıingi tergeý amaldary júrgizilýde.
