OQO-da pııazdy ınnovatsııalyq ádispen egýdi qolǵa aldy
ShYMKENT. QazAqparat - Ońtústik Qazaqstan oblysynda dıqandar pııazdy ınnovatsııalyq ádispen egýdi qolǵa aldy. Shardaralyq sharýalar ótken jyly gektaryna 80 tonnadan ónim alsa, bıyl gektaryna 100 tonnadan astam pııaz jınaýdy josparlap otyr, dep habarlaıdy QazAqparat HAA tilshisi.
Bes jyldan beri pııaz egý jumysymen aınalysyp kele jatqan «Turar» sharýa qojalyǵy bıylǵy jyly 35 gektar alqapqa dán sepken. Pııaz tuqymyn bir mezette birneshe jumysty atqaratyn jańa zamanaýı tehnıkamen egýde. ıAǵnı, tehnıka, birinshiden arasy 3 sm-den tuqym tastasa, ekinshiden, tamshylatyp sýǵaratyn sý tútigin qosa kómýde. Sondaı-aq, bir gektar jerge 6 kelideı tuqym ketedi, al joǵary sortty tuqymnyń bir kelisi 64 myń teńge turady. Jerdi jyrtýdan bastap, jıyn-terim naýqanyna deıingi jalpy shyǵynnyń kólemi ár gektarǵa 1 mln. 300 myń teńgeden jumsalady eken. «Ranko» dep atalatyn jańa tuqym sortyn egip jatqan dıqandar munyń ónimi bitik bolaryna senimdi. Ári túsken ónim ketken shyǵyndy eselep jabady,- deıdi olar.
Eske salaıyq, Shardara aýdanyndaǵy Jaýshyqumnyń jýasy jalpaq jurtqa jaqsy tanys. Tipti, 2013 jyly Máskeýde ótken jármeńkege «Turar» sharýa qojalyǵy 20 tonna ónim aparǵan bolatyn.
