OQO-da paıdalanylmaı jatqan 57 myń gektar jer memleket menshigine qaıtaryldy
ASTANA. QazAqparat - Ońtústik Qazaqstan oblysy ákiminiń orynbasary Erbol Sadyr ózi jetekshilik etetin sala mamandarymen keńeıtilgen májilis ótkizdi, dep habarlaıdy ákimdiktiń baspasóz qyzmeti.
Jıynnyń kún tártibinde «Ońtústik Qazaqstan oblysynda «Órleý» jobasynyń iske asyrylý barysy men jerdi túgendeý jumystarynyń jaıy qaraldy.
Májiliste alǵashqy bolyp baıandama jasaǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Á.Temirbaeva 2017 jyly az qamtamasyz etilgen otbasylar qatarynan 126 myń azamatty qamtý úshin 5,1 mlrd. teńge qarjy bólingenin aıtty.
Jyl sońyna deıin tıisti kómek kórsetilip, negizgi kórsetkishterge qol jetkiziletinin málimdegen basqarma basshysy 2018 jyly áleýmettik kómek júıesi jańǵyrtylyp, úsh birdeı kómek túri, ıaǵnı, ataýly áleýmettik kómek pen balalar járdemaqysy jáne arnaýly memlekettik járdemaqy biriktirilip, shartty aqshalaı kómek kórsetiletinin jetkizdi.
«Órleý» jobasy sol jańǵyrtýdyń bastapqy qadamdarynyń biri ekenin aıtqan oblys ákiminiń orynbasary E.Sadyr áleýmettik kómek júıesin jańǵyrtýda, kúnkóris deńgeıinen tómen turatyn otbasylarǵa qoldaý kórsetý boıynsha júıeli túrde jumys atqarýdy tapsyrdy.
Munan soń, otyrysta sóz alǵan jer qatnastary basqarmasy basshysynyń orynbasary E.Tilegen 2016 jyly aýyl sharýashylyǵy maqsatyndaǵy jerlerge júrgizilgen túgendeý jumystarynyń nátıjesin baıandady. Onyń aıtýynsha, oblystaǵy 2447 agroqurlymdardyń ıeligindegi 180,5 myń gektar jer nysanaly maqsatyna saı paıdalanylmaı jatqandyǵy anyqtalǵan. Sonymen qatar, ol aýyl sharýashylyǵy maqsatyndyǵy 366 paıdalanýyshynyń 57,5 myń gektar jeri búgingi kúnge memleket menshigine qaıtarylǵanyn málim etti.
Májilisti qorytyndylaǵan oblys ákiminiń orynbasary jaýapty basshylarǵa naqty tapsyrmalar berip, jerdi túgendeý jumystaryn tezdetýdi jáne oryn alǵan kemshilikterdi túzetýdi mindettedi.
