OQO-da para alyp ustalǵan sýdıaǵa úkim shyqty
Qylmystyq isti qaraǵan sýdıa Erkebulan Tóleshov úıqamaqta júrgen aıyptalýshyny sot zalynan qamaýǵa alý týraly úkim shyǵardy.
«Nııazbekov Abaı Jıenbekovıch QR Qylmystyq kodeksiniń 366-baby 2-bóligimen («Para alý») kináli dep tanylsyn. Osy bap boıynsha memlekettik qyzmette, sýdıa qyzmetinde, jergilikti ózin-ózi basqarý organdarynda, Ulttyq bankte jáne onyń vedomstvolarynda, memlekettik uıymdar men ulttyq kompanııalarda, memlekettik úlesi 50 paıyzdan asatyn uıymdarda, ulttyq basqarýshy holdıngter men enshiles uıymdarynda laýazymdy qyzmetter atqarý quqyǵynan ómir boıyna aıyryla otyryp, bas bostandyǵynan aıyrý jazasy taǵaıyndalsyn. Jazany qylmystyq atqarý júıesiniń qaýipsizdigi ortasha mekemesinde óteý belgilensin», -dedi sýdıa Erkebulan Tóleshov.
Jazany óteý merzimi búgin, 13 maýsymnan bastap belgilendi. Nııazbekovtyń úıqamaqta bolǵan ár kúni eki kún bolyp eseptelip, ol jaza merziminen shegerildi. Solaı, eks-sýdıa túrmede 4,6 jyl otyratyn bolady.
Eske salaıyq, Maqtaaral aýdandyq sotynyń burynǵy sýdıasy bıylǵy 30 qańtar kúni 500 myń teńge kóleminde para alyp jatqan jerinen ustalǵan bolatyn. Sot barysynda 33 jastaǵy sýdıanyń parany mektep dırektorynan hatshysy arqyly alǵany belgili boldy. ıAǵnı ol sotqa talap-aryz túsirgen mektep basshysyna kómektesýge ýáde etken.