OQO-da ózin urlap ketti dep jalǵan aqparat taratqan áıel Tarazdaǵy qonaqúıden ustaldy
ShYMKENT. QazAqparat - Ońtústik Qazaqstan oblysynda ózin ózi urlap ketti dep polıtsııaǵa habar bergen áıeldiń aıtqandary jalǵan bolyp shyqty.
Ony tártip saqshylary Tarazdaǵy qonaqúılerdiń birinen taýyp alǵan, dep habarlaıdy QazAqparat tilshisi.
Kentaý qalalyq polıtsııa bólimshesine jergilikti turǵyn aryzdanǵan. Ol uıaly telefonyna belgisiz bireýler áıelin urlap ketkeni jáne ony qaıtarý úshin 3 mln teńge surap habarlama jibergenin aıtypty. Aqshany der kezinde jetkizbegen jaǵdaıda óltiremiz dep qorqytqan bolyp shyqty. Osydan keıin tártip saqshylary Qylmystyq kodekstiń 126 «Bas bostandyǵynan zańsyz aıyrý» jáne 194 «Bopsalaý» baptarymen is qozǵap, jedel izdestirý sharalaryn júrgizdi. Kásibı izkesýshilerden arnaıy top qurylyp, aýyr qylmysty ashýǵa kiristi. Nátıjesinde ishki ister qyzmetkerleri urlandy degen kelinshekti Tarazdaǵy qonaqúılerdiń birinen taýyp alǵan. Ol sol jerde ózine bólme alyp, demalyp jatqany anyqtaldy. Keıinnen belgili bolǵandaı, ol adam urlyǵyn ózi qoldan jasaǵan bolyp shyqty. Tergeý barysynda kelinshek jeke basynda qaryzdary kóbeıip ketken soń osyndaı áreketke barǵanyn aıtqan. Túrkistan qalasynda ol jurtty qarjy pıramıdasyna qosamyn dep aldap aqshalaryn alyp, bas paıdasyna jaratyp júrgen. Qaryzǵa belsheden batqan soń, tanystary aqshalaryn talap etipti. Osy bereshekten qutylý úshin ol kúıeýinen meni urlady dep aqsha almaq bolypty.
Qazirgi tańda bul azamatshanyń ústinen Qylmystyq kodekstiń 419 baby 3 bóligimen «Kórineý jalǵan sóz jetkizý, adamdy sybaılas jemqorlyq, aýyr nemese asa aýyr qylmys jasady dep aıyptaýmen ulasqan ne paıdakúnemdik nıetpen jasalǵan is-áreket» boıynsha is qozǵalyp, tergeý amaldary júrgizilýde. Qylmysy dáleldense, ol úsh jyldan jeti jylǵa deıin bas bostandyǵynan aıyrylýy múmkin.
