OQO-da ózenge batyp ketken 3 jasar sábı tabylmaı jatyr
ShYMKENT. QazAqparat - Ońtústik Qazaqstan oblysynda Keles ózenine batyp ketken 3 jasar búldirshin búldirshin izdestirilip jatyr. Eki kúnnen beri izdeý sharalaryn júrgizip jatqan qutqarýshylar laılanyp ketken ózen sýy qıyndyq týǵyzyp otyrǵanyn aıtady, dep habarlaıdy QazAqparat HAA tilshisi.
Belgili bolǵandaı, qaıǵyly oqıǵa Saryaǵash aýdanyna qarasty Jambyl aýylynda bolǵan. 2014 jylǵy balaqaı ózen jaǵasynda oınap júrip, sýǵa batyp ketipti. Onsyz da ózen sýy arnasynan asyp turǵandyqtan turǵyndarǵa ózdiginshe izdeý qıynǵa soǵady. Keıin olar qutqarýshylardy shaqyrtqan. Oqıǵa ornyna óńirdiń jedel-qutqarý jasaǵynyń 5 qyzmetkeri jetti. Olar aǵysy qatty ári sý laılanyp ketken ózende izdestirý sharalaryn júrgizip jatyr.
Alaıda tereńdigi 5-6 metr ári arnasy 30-40 metr bolatyn ózennen búldirshindi tabý qıynǵa soǵýda. Qutqarýshylarǵa aýdannyń tótenshe jaǵdaı qyzmetkerleri men balanyń týystary da kómektesýde. Biraq ázirge nátıje joq. Sýdan qutqarýshylar qazir sondaı-aq Otyrar aýdanynda sýǵa batqan 25 jastaǵy turǵyndy da izdestirýde. Arys ózenine batyp ketken jigittiń denesi tabylmaı otyr.
Aıta keteıik, bıyl jyl basynan beri óńirde 7 adam sýǵa ketip, ajal qushty. Onyń altaýy kámelet jasyna tolmaǵan balalar.
