OQO-da ózbekstandyq teatr ujymynyń kúnderi ótti
ShYMKENT. QazAqparat - Ońtústik Qazaqstan oblysynda ózbek ulttyq akademııalyq drama teatrynyń gastroldik issapary ótti. Qazaqstandaǵy Ózbekstan Respýblıkasynyń jyly aıasynda óńirge kelgen kórshi eldiń óner ujymy úsh kún boıy oblys jurtshylyǵyna Erkın Hýshvaqtovtyń «Kóńil» komedııasyn usynyp, zor qoshemetke bólendi, dep habarlaıdy QazAqparat tilshisi.
Oblystyq mádenıet jáne tilderdi damytý basqarmasynyń uıymdastyrýymen ótken sharada ózbekstandyq óner ujymy Shymkent qalasy men Saıram aýdandarynda atalǵan komedııany sahnalady. Týyndyda otbasy baqyty men qundylyǵy jaıynda tereń oı qozǵalady. Gastroldik sapardyń jabylý saltanatynda Ózbek ulttyq akademııalyq drama teatrynyń dırektory, Ózbekstan eńbegi sińgen ártis, «Mehmat-Shýhrat» ordeniniń ıegeri Fathýlla Masýdov jyly shyraımen qarsy alǵan ońtústiktiń kórermenderine rızashylyǵyn bildirdi. Eki el arasyndaǵy baılanys odan da nyǵaıa túsetindigine senimdiligin jetkizdi.
Shara sońynda teatr ujymyna Oblystyq mádenıet jáne tilderdi damytý basqarmasynyń bólim basshysy Ǵalııa Sharafıeva men óńirdiń Ózbek mádenı ortalyǵynyń tóraǵasy Ikram Hashımjanov arnaıy alǵys hattar tabystady.
