OQO-da Ózbekstan azamaty boıjetkendi pyshaqtap, tonap ketken
ShYMKENT. QazAqparat - Ońtústik Qazaqstan oblysynda Ózbekstan azamaty boıjetkendi pyshaqtap, tonap ketken, dep habarlaıdy QazAqparat tilshisi óńirdiń Іshki ister departamentine silteme jasap.
Qylmystyq oqıǵa Saryaǵash aýdanynda boldy. Polıtsııaǵa jaraly jas qyzdyń aýdandyq aýrýhanaǵa jetkizilgeni týraly habarlanǵan. Oqıǵa ornyna barǵan tártip saqshylary 20-25 jas shamasyndaǵy qyzdyń belgisiz azamatpen janjal kezinde pyshaq jaraqatyn alǵanyn anyqtady. Qyz kómekke shaqyra bastaǵan kezde kúdikti jábirlenýshiniń uıaly telefonyn ózimen birge alyp, oqıǵa ornynan qashyp ketken.
Saryaǵash aýdandyq ishki ister bóliminiń qyzmetkerleri jedel izdestirý sharasy barysynda 40-45 jastaǵy Ózbekstan azamatyn ustady.
Qazirgi tańda onyń ústinen «adam óltirýge oqtalý» jáne «qaraqshylyq» baptarymen qylmystyq is qozǵalyp, sotqa deıingi tergeý amaldary júrgizilýde.
Sondaı-aq OQO ІІD-den habarlaǵandaı, Qazyǵurt aýdanynda betperde kıgen belgisiz top músheleri mekemelerdiń birine tıesili avtokólikti toqtatyp, júrgizýshisine kúsh kórsetken. Sóıtip 700 myń teńgesin qoldy etken. Jedel izdestirý sharalary barysynda 4 kúdikti ustaldy. 20-30 jastaǵy seziktiler oblys turǵyndary bolyp shyqty. Olardyń osyǵan uqsas basqa da qylmystarǵa qatystylyǵy tekserilip jatyr. Sybaılastary bolǵan besinshi kúdiktige izdeý jarııalandy.
cdn.fishki.net saıtynan alynǵan ıllıýstratsııalyq foto
