OQO-da ótken jyly apatty jáne úsh aýysymdy 21 mekteptiń máselesi sheshildi
ShYMKENT. QazAqparat - Ońtústik Qazaqstan oblysynda ótken jyly 82 bilim nysanynyń qurylysy júrgizilip, jyl sońynda 32-niń qurylysy aıaqtalǵan. Onyń ishinde, apatty jáne úsh aýysymdy 21 mekteptiń máselesi sheshilgen. Bul týraly búgin aımaq basshysy Janseıit Túmebaev halyq aldyndaǵy eseptik jıynda aıtyp ótti, dep habarlaıdy QazAqparat tilshisi.
Oblys ákiminiń sózinshe, óńirde sondaı-aq jańadan 133 mektepke deıingi bilim berý uıymdary ashylyp, balabaqshalardaǵy oryn sany 14 myńǵa ulǵaıyp otyr. Al, balabaqshamen qamtý deńgeıi 87,1 paıyzǵa jetken. Aǵymdaǵy jyly bilim salasynda 63 nysannyń qurylysyna 14,4 mlrd qarastyrylyp, 41 nysannyń qurylysyn aıaqtaý josparlanýda.
Jıynda sondaı-aq jastardy jataqhanamen qamtamasyz etý máselesi de kóterildi. Ákimge suraq qoıǵan jastar jaǵy qalada 100 myńnan asa stýdent bar ekenin aıtyp, olardyń nebári 6 myńy ǵana jataqhanamen qamtamasyz etilgenin kóterdi. Bul máselege Janseıit Túımebaev aldaǵy ýaqytta oblys ortalyǵynan birneshe oqý ornynyń jastary bir jerge shoǵyrlanatyn jastar jataqhanasy men ashana, demalys orny bar keshen salynatynyn atap ótti. Aımaq basshysy sondaı-aq jetim balalar ýaqytsha turatyn «Jasóspirimder úıi» keleshekte «Jastar úıi» bolyp ózgeretinin, onda ata-anasyz ósken jastar 29 jasqa deıin turaqtaı alýy úshin arnaıy tapsyrma berýge ýáde etti.
