OQO-da ótken jyly 19 jumysshy jazataıym oqıǵadan qaza tapty
ShYMKENT. QazAqparat - Ońtústik Qazaqstan oblysynda ótken jyly 19 jumysshy túrli jazataıym jaǵdaılarda qaza tapty. Taǵy 108 adam jumys ornynda zardap shekken. Bul týraly búgin óńirlik kommýnıkatsııa qyzmetinde ótken baspasóz máslıhatynda oblystyń eńbek ınspektsııasy basqarmasynyń basshysy Almasbek Mamytbekov málimdedi, dep habarlaıdy QazAqparat tilshisi.
Oblystyń bas eńbek ınspektorynyń sózinshe, bir jyl kóleminde óńirdegi óndiristik oryndarda 117 jazataıym oqıǵa oryn alǵan. Olardy tekserý barysynda qaýipsiz eńbek tásilderine jetkilikti úıretpeý men jumystardy qanaǵattanǵysyz dárejede uıymdastyrý, óndiristik jáne eńbek tártibiniń buzylýy sebep bolypty. Sondaı-aq joǵary qaýiptilik jaǵdaıynda jumystardy qaýipsiz júrgizýge qadaǵalaýdyń bolmaýy men aqaýly mashınalardy paıdalaný, tehnıka qaýipsizdigi boıynsha nusqaýlyqtyń ótkizilmeý men zardap shegýshiniń óreskel abaısyzdyǵy bolǵany anyqtalǵan.
Budan bólek eńbek ınspektory oblystaǵy 17 kásiporyndar men mekemelerdegi 2174 jumysker jalaqy ala almaǵanyn aıtady. ıAǵnı, jumys berýshilerdiń qaryzy 292,7 mln teńgege jetken. Bul kúnde onyń 155,3 mln teńgesi ǵana tólenipti. 1100 jumysker áli kúnge 137,4 mln teńge kólemindegi jalaqysyna qol jetkize almaı keledi.
Jalaqyny ýaqtyly tólemeý túrindegi eńbek zańnamasyn buzǵany úshin atalǵan zańbuzýshylyq oryn alǵan kásiporyndar men mekemelerge 5,3 mln teńge kóleminde 17 ákimshilik aıyppul salynǵan.
