OQO-da ótken jıyn: Bloger degen kim

ShYMKENT. QazAqparat - Ońtústik Qazaqstan oblysynda jas blogerler men áleýmettik jeli belsendileriniń basqosýy ótti. Óńirdiń jastar saıasaty máseleleri jónindegi basqarmasynyń uıymdastyrýymen ótken sharaǵa 100-ge tarta jastar qatysty, dep habarlaıdy QazAqparat HAA tilshisi.

Josparly basqosýda jastarǵa qoǵam belsendileri  arnaıy semınar-sabaqtar ótip, áleýmettik jelilerde oı-pikirdi saýatty jetkizýdiń mánisin túsindirdi. Óz kezeginde jastar aqparattyń jyldam taralatyn jerinde onyń shynaıy bolýy,  kópshiliktiń nazaryna iligýi men ózgelerge  senimin qalyptastyrýǵa sep bolatynyn bildi.

«Bloger degenniń ózi - siz ben bizdiń jáı-kúıimizdi kúıttep, qoǵamnyń qozǵaýshy kúshine aınalatyn adamdar ǵoı. Áleýmettik jeliniń búgingi belsendi ókili bolǵanymmen, men aldaǵy kúnderi bloger retinde paraqshamdy júrgizgim keledi. Qazirgi arman-maqsatym da osy», - deıdi Sozaq aýdanynan kelgen áleýmettik jeliniń belsendisi Aıgerim Aıtahanova.

Aıta keteıik, aıtýly joba aıasynda osy jyldyń maýsym aıynda jastarǵa arnaıy semınar-sabaqtary uıymdastyrylǵan bolatyn. Onda 250-ge tarta aýyl jastary men jýrnalıstter, belsendi jastar durys aqparat taratý, paraqshany alyp júrý men durys pikir bildirý máselelerin talqylaǵan edi.