OQO-da ótken tamyz konferentsııasynda úsh ustazǵa páter kilti tabystaldy

 Sharaǵa oblys ákimi J.Túımebaev qatysyp, eń aldymen, oblystaǵy aýdan, qalalardaǵy mektepterdiń jyl boıǵy atqarǵan jumystary men jetistikteri pash etilgen ınteraktıvti taqtaly kórmeni tamashalady.
 

Saladaǵy máseleler jan-jaqty talqylanatyn jyl saıynǵy dástúrli sharaǵa QR Bilim jáne ǵylym mınıstrliginiń ókili, oblystyq máslıhat depýtattary men basqarma basshylary, aýdan, qala ákimderi, jalpy bilim salasyna qatysty qurylymdardyń jetekshileri syndy 800-den astam adam qatysty.
 

Eń aldymen, konferentsııada oblystyq bilim basqarmasynyń basshysy Isataı Saǵyndyqov bilim salasyndaǵy jetistikter men alda atqarylatyn jumystar jaıyn baıandady.

Atap aıtqanda, bıyl bilim salasyn qarjylandyrýǵa oblystyq bıýdjetten 257,6 mlrd teńge bólinip, ótken jylmen salystyrǵanda 19  mlrd teńgege  artyp otyr. Munan bólek, osy jyly 31,2 mlrd teńgege 79 bilim nysanynyń qurylysy júrgizilip jatsa, onyń 29 bilim nysany jyl sońyna aıaqtalyp, paıdalanýǵa beriledi.

2016 jyly apatty jáne úsh aýysymdy 43 mektep bolǵan edi. Aǵymdaǵy jyly 20 mekteptiń qurylysy tapsyrylady, al qalǵan 23 mekteptiń qurylysyn 2018-2019 jyldary aıaqtaý jospary iske asa bastady. Mektepke deıingi tárbıe men oqytý uıymdary ótken oqý jylymen salystyrǵanda 95 birlikke (jekemenshik - 93 balabaqsha, 3 shaǵyn ortalyq) artyp, balabaqshaǵa kezekke turǵan 3-6 jastaǵy balalar sany 43 myńnan 28 myńǵa azaıdy.

Memlekettik baǵdarlamaǵa sáıkes mektep oqýshylary tegin oqýlyqtarmen qamtamasyz etilýde. Oblys boıynsha osy oqýlyqtarǵa jalpy 4,5 mlrd teńge bólinip, ótken jylmen salystyrǵanda 1,8 mlrd teńgege ósti.

Jıyn barysynda sóz alǵan oblys basshysy óńir pedagogtaryn jańa oqý jylymen quttyqtap, Elbasynyń rýhanı jańǵyrý  baǵdarlamasynda aıtylǵan bilim salasyna qatysty  júktegen mindetterge toqtaldy.

«Búgingi tamyz keńesi - bilim berý isindegi jeńisterimiz ben kemshilikterdi saralaıtyn aıshyqty alań jáne aldymyzda turǵan mindetterdi pysyqtaıtyn mańyzdy basqosý. Elbasy Nursultan Ábishuly Nazarbaev «Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatar¬ynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi.» - degen bolatyn. Sondyqtan da búgingi tań - bilim berý mazmunyna, oqýshy men pedagog tulǵasyna jáne qyzmetine degen kózqarastar túbegeıli ózgeriske bet buryp otyrǵan kúrdeli kezeń», - dedi J.Túımebaev.
 

Bilim berý salasyndaǵy jetistikterdi saralap bolǵan soń, aımaq ákimi saladaǵy kemshin túsip júrgen máselelerge de toqtaldy. Sapaly bilim berý jaıttary men sýıtsıd, sybaılas jemqorlyq salasyndaǵy ózekti máselelerdi sheshýdiń birqatar joldaryn nusqaǵan Janseıit Qanseıituly atalǵan problemalardy sheshýde óńir turǵyndarynyń da belsendi bolýy qajettigin jetkizdi.
 

Tamyz konferentsııasynda bilim salasynda talaı jyldardan beri úlgili qyzmet etip kele jatqan óńirdegi úsh ustazǵa - atap aıtqanda, Shymkent qalasy, №39 M.Jumabaev atyndaǵy jalpy orta mektebiniń bastaýysh synyp muǵalimi Aınur Dúısebekovaǵa, Shymkent qalasy, №66 Qazyǵurt jalpy orta mektebiniń ınformatıka pániniń muǵalimi Janat Musaevaǵa jáne Túrkistan qalasy, №9 Nekrasov atyndaǵy gımnazııasynyń qazaq tili páni muǵalimi Venera Batyrqulovaǵa páter kilti tabystaldy. Sonymen qatar, jıynda oblys ákiminiń Gramotasyna 5 padagog ıe bolsa, 8 ustaz oblys basshysynyń Alǵys hatyn aldy. Qazaqstan Respýblıkasy Bilim jáne ǵylym mınıstrliginiń nagradalary aıasynda 5 muǵalim «Y.Altynsarın» tósbelgisin, 5 ustaz «Bilim berý isiniń qurmetti qyzmetkeri» tósbelgisin, 4 sala qyzmetkerli «Qurmet gramotasyn» jáne 4 muǵalimge «Alǵys haty» buıyrdy. 
 

Aıta ketý kerek, óńirde qazirgi  tańda 69 myńnan asa muǵalim bilim beredi. 2017-2018 jańa oqý jylyna 640 myńǵa jýyq oqýshy keledi, ıaǵnı ótken jylmen salystyrǵanda 28 myńǵa (2016j.-611318) ósedi degen sóz. Onyń ishinde, 1-synypqa  baratyn balalar sany  73691  balany qurap otyr. Jalpy óńir boıynsha 1036 mektep bar, onyń ishinde 7-eýi jeke menshik.