OQO-da ótken qaıyrymdylyq sharasynda 4,5 mln teńgeden asa qarjy jınaldy
Oblystyq Qazaqstan halqy Assambleıasy uıymdastyrǵan sharaǵa jany jomart jandar qatysyp, muqtajdarǵa qarjylaı kómek kórsetti, dep habarlaıdy QazAqparat tilshisi.
Assambleıa ǵımaratynda ótken ıgi sharaǵa oblystyq máslıhattyń depýtattary, kásipkerler, etnomádenı birlestikterdiń tóraǵalary men belsendi músheleri, oblystyq assambleıa janyndaǵy qurylymdardyń jetekshileri jáne óńir turǵyndary qatysty.
Qaıyrymdy jandardyń basyn qosqan sharanyń basty maqsaty kópshiliktiń demeýimen naýqas búldirshinderge kómek qolyn sozý boldy. Jıynda oblystyq Qazaqstan halqy Assambleıasy tóraǵasynyń orynbasary Muratáli Qalmuratov sóz sóılep, forýmnyń mańyzyna toqtaldy. Ol qaıyrymdylyq sharalaryn úılestirý búginde assambleıa jumysynyń basty baǵytyna aınalǵanyn aıtyp ótti. Forým aıasynda oblystyq ázil-syqaq teatrynyń ártisteri «Yntymaq áýenderi» atty mýzykalyq komedııasyn kópshiliktiń nazaryna usyndy. Al, muqtaj jandarǵa jomarttyq tanytqandar arnaıy qoıylǵan jáshikke qarjy saldy.
Іs-shara sońynda arnaıy qurylǵan komıssııanyń tóraǵasy, OQO Qazaqstan halqy Assambleıasy janyndaǵy Qoǵamdyq kelisim keńesiniń jetekshisi Orynbaı Rahmanberdıev bıletten jáne qaıyrymdylyq aktsııasynan qolma-qol 4 mln 589 myń teńge jınalǵanyn, taǵy birqatar jomart jandardyń 1 mln 400 myń teńgeni naýqas balalardyń jeke shotyna aýdarýǵa ýáde bergenin habarlady. Jıynda 5 balanyń ata-anasyna 500 myń teńgeden tapsyrylyp, qalǵan qarjy da tolyǵymen Almaty, Astana qalalaryndaǵy medıtsınalyq uıymdarda em alý úshin kezekte turǵan ońtústikqazaqstandyq balalardyń emdelýine jumsalatynyn aıtty.
Aıta ketý kerek, qaıyrymdylyq sharasyna "Shymkent qus", «Ordabasy qus», «Bal Tekstıl», «Amangeldi» jaýapkershiligi shekteýli seriktestikteri men Qazyǵurt aýdanynyń birqatar kásipkerleri belsendilik tanytty.