OQO-da otbasylyq turmys barysyndaǵy qylmystar 5,9 paıyzǵa tómendegen
ASTANA. QazAqparat - Ońtústik Qazaqstan oblysynda turmysta jasalǵan qylmystardyń aldyn alý maqsatynda «Turmys» jedel-profılaktıkalyq is-sharasy ótti. Sondaı-aq «Otbasyndaǵy zorlyq-zombylyqsyz Qazaqstan» pılottyq jobasy aıasynda aktsııalar uıymdastyryldy. Nátıjesinde otbasylyq turmys barysynda jasalatyn qylmystar sany 5,9 paıyzǵa tómendedi. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq jergilikti polıtsııa qyzmetiniń bastyǵy Ábdiǵanı Seıdýalıev málim etti.
Sonymen qatar, qoǵamdyq oryndarda jasalǵan qylmystar 26,4 paıyzǵa, al kóshede jasalǵan qylmystar 32,9 paıyzǵa tómendegen. Jalpy oryn alǵan bótenniń múlkin urlaý qylmystary 12,4 paıyzǵa, mal urlyǵy qylmystary 18,8 paıyzǵa kemigen.
«Jol-kólik oqıǵalarynyń aldyn alý, sondaı-aq oblys avtojoldarynda qalyptasqan jedel jaǵdaıdy jaqsartý, jol-kólik oqıǵalarynyń deńgeıin azaıtý, aýyrtpashylyqty tómendetý maqsatynda, aǵymdaǵy jyly oblys aýmaǵynda «Qaýipsiz jol», «Jaıaý júrginshi», «Abaılańyz balalar», «Avtobýs», «Mas júrgizýshi-qylmysker» jedel-profılaktıkalyq is-sharalary ótkizilip, óz jalǵasyn tabýda», - dedi Ábdiǵanı Toıshyuly.
Ábdiǵanı Seıdýalıevtiń aıtýynsha, profılaktıkalyq sharalardyń nátıjesinde oblys aýmaǵyndaǵy joldarda bolǵan jol kólik oqıǵalary 5,9 paıyzǵa tómendegen. Alaıda oblystyq jáne jergilikti mańyzdy avtojoldarda bolǵan 801 JKO-nyń saldarynan 142 adam qaza taýyp, 1133-i ártúrli dene jaraqattaryn alǵan.
Budan bólek, tabıǵatty qorǵaý salasy boıynsha 170 qylmystyq is qozǵalyp, 624 ákimshilik quqyqbuzýshylyq jáıtteri anyqtalǵan. OQO ІІD Jergilikti polıtsııa qyzmetiniń qurylymdary múddeli memlekettik organdarmen birlese otyryp «Tabıǵat», «Qyzǵaldaq», «Ýyldyryq», «Jer qoınaýy» syndy aldyn alý is-sharalaryn uıymdastyryp keledi.
