OQO-da órttiń oryn alý jaǵdaılary azaıdy
ShYMKENT. QazAqparat - Ońtústik Qazaqstan oblysynda órttiń oryn alý jaǵdaılary azaıǵan. Bul týraly búgin OQO Aımaqtyq kommýnıkatsııalar qyzmetinde ótken brıfıngte oblystyq tótenshe jaǵdaılar departamentiniń basqarma basshysy Nurǵalı Júnisov málim etti.
Jazǵy órt qaýpi kezeńinde óńirdegi orman, dala jáne egis alqaptarynda órt qaýipsizdigin qamtamasyz etý boıynsha ótken jıynda orman órtiniń aıtarlyqtaı azaıǵanyn jetkizgen spıker dala órtiniń sany 25 paıyzǵa, shyǵyn 71 paıyzǵa azaıǵanyn aıtty. Sonymen birge, orman órtiniń sany 75 paıyzǵa, shyǵyny 100 paıyzǵa kemigen. Dala alqaptarynyń órtke oraný jaǵdaılary 33 paıyzǵa kemigen.
«Órt oqıǵalarynyń aıtarlyqtaı azaıýyna órtke qarsy mıneraldy jolaqtyń eni 4 metrdiń ornyna 7 metr etip ózgerýiniń nátıjesinde qol jetkizildi. Mamyr jáne shilde aılarynda 2 kezeńmen júrgizilgen jumystardan bólek, orman sharýashylyǵynyń bazasynda shartty dala órtin sóndirý boıynsha órt-taktıkalyq oqý-jattyǵýlarynyń ótkizilip otyrýy da jumystyń ońdy nátıje berýine sebep bolýda», - dedi N.Júnisov. 
Sonymen qatar, baspasóz máslıhatynda atalǵan departamenttiń bólim basshysy Nurjan Ásibekov sýda bolǵan jazataıym jaǵdaılarǵa sholý jasady. Aıtýynsha, bıylǵy jaz maýsymynda sýǵa ketý jaǵdaılary kóbeıgen. Máselen, osy maýsymda mas kúıinde sýǵa shomylýdyń saldarynan 2 adam sýǵa batsa, eresek adamdardyń qaraýynsyz qalǵan 41 bala tilsiz jaýdyń qarmaǵyna tutyldy. Sonymen birge, sýǵa shomylý maýsymy kezeńinde sýdaǵy qaýipsizdiktiń qarapaıym qaǵıdalaryn buzý, atap aıtqanda óz kúshin asyra baǵalaý sebebinen 15 adam qaza tapqan. Degenmen, der kezinde atqarylǵan jumystardyń nátıjesinde, 18 adam, onyń ishinde, 3 jasóspirim bala qutqarylǵan. Sondaı-aq, qaıǵyly jaǵdaılardy boldyrmaý maqsatynda departament mamandary 176 balany júzýge úıretken.
Óńirdegi aýa raıynyń áli de jyly ekendigin alǵa tartqan tótenshelikter ońtústikqazaqstandyqtardy sý aıdyndaryndaǵy qaýipsizdik qaǵıdalarynyń talaptaryn saqtaýǵa shaqyrdy. Kelesi shomylý maýsymynda sýdaǵy qaýipsizdikti qamtamasyz etetin qutqarý beketteriniń sanyn arttyrý úshin halyqty jumyspen qamtý ortalyqtarymen birlesip eńbek etýdi josparlap otyrǵanyn jetkizgen N.Ásibekov erikti qutqarýshylardy jedel-qutqarý jasaqtarynda oqytyp, olardy da jumyldyrýdy kózdep otyrǵanyn jetkizdi, dep habarlaıdy OQO ákiminiń baspasóz qyzmeti.
