OQO-da órtten zardap shegýshiler sany edáýir azaıǵan
ASTANA. QazAqparat - Ońtústik Qazaqstan oblysynda 2017 jyly tirkelgen órt oqıǵalary byltyrǵy jylǵa qaraǵanda 22,4 paıyzǵa azaıǵan. Al órtten zardap shekkender sany 50 paıyzǵa, qaıtys bolǵandar sany 33,3 paıyzǵa tómendegen. Bul týraly oblystyq óńirlik kommýnıkatsııalar qyzmetinde ótken brıfıngte oblystyq Tótenshe jaǵdaılar departamenti bastyǵynyń orynbasary Erǵalı Bahaev málimdedi.
Bul kórsetkish aldyn alý sharalarynyń udaıy júrgizilgendiginiń nátıjesinde bolyp otyr.
Onyń aıtýynsha, tirkelgen órt oqıǵasynyń jalpy kórsetkishiniń 60 paıyzdan astamy turǵyn úı sektorlarynda oryn alyp keledi.
Sonymen qatar, qys mezgilindegi tótenshe jaǵdaılarǵa daıyndyq kezinde oblys kólemindegi respýblıkalyq jáne oblystyq mańyzy bar joldarǵa qyzmet kórsetetin jol tehnıkalarynyń daıyndyǵy pysyqtalǵan.
«Jalpy oblys boıynsha 7 asý, 11 jylytý beketi bar. Olardyń daıyndyǵyn qyzmetkerlerimiz jol qyzmetiniń ókilderimen birlesip baqylaýǵa alyp otyr. Bul beketter tolyǵymen tósek oryndarymen jáne kómirmen qamtamasyz etilgen. Oblystyq mańyzy bar joldarǵa qyzmet kórsetý úshin 138 arnaıy tehnıka daıyn tur. Aıta keterligi, qaýipti joldardyń tórt baǵytyna oblystyq Tótenshe jaǵdaılar departamentiniń joǵary ótimdi 63 tehnıkasy bekitilgen», - dedi Erǵalı Jarasbekuly.
Budan bólek, Jańa jyl merekesine oraı daıyndyq jumystary pysyqtaldy. Oblystyq Tótenshe jaǵdaılar departamentiniń basqarma bastyǵy Baqytjan Zaparov oblys turǵyndaryna pırotehnıkalyq zattardy qoldanýda saqtyq sharalaryn eskerý kerektigin jetkizdi.
Qazirgi tańda Jańa jyl merekesin ótkizetin oblys aýmaǵynda jalpy 1500-ge jýyq oryn belgilengen. Oblystyq Tótenshe jaǵdaılar departamentiniń qyzmetkerleri merekelik is-sharalar ótkiziletin oryndarda órt qaýipsizdigin saqtaý jumystaryn júrgizip, kezekshilik uıymdastyrýda.
