OQO-da órt qaýipsizdigin saqtamaǵan bilim mekemelerine 44 mln teńge aıyppul salyndy
ShYMKENT. QazAqparat - Ońtústik Qazaqstan oblysynda mektepterdiń 80 paıyzǵa jýyǵynda órt qaýipsizdigi erejeleri saqtalmaǵan. Mundaı kemshilikter óńirdiń tótenshe jaǵdaılar qyzmetiniń josparly tekserisi barysynda anyqtaldy, dep habarlaıdy QazAqparat HAA tilshisi.
Úsh aı kóleminde júrgizilgen tekserý sharalary barysynda tótenshe jaǵdaılar qyzmetkerleri 1750 mekemede bolǵan. Onyń ishindegi 1663 nysanda 8611 derek boıynsha kemshilikter anyqtalǵan. Atap aıtqanda, órt sóndirgish quraldary men dabyl qaqqysh júıesi, arnaıy satylar tabylmapty. Qarapaıym erejelerdi saqtamaǵan mekeme basshylaryna 44 mln teńge kóleminde ákimshilik aıyppul salyndy.
«Kemshilikterdiń kópshiligi Shardara men Saryaǵash aýdandaryndaǵy mektepterde tirkelgen. Máselen, Saryaǵash aýdanyndaǵy 108 mekteptiń 93-inde órt sóndirgish quraldar joq bolyp shyqty. Biz kemshilikterdi tez arada joıý týraly eskertýler berdik. Eger bul kemshilikter der kezinde retke keltirilmese bul mekemelerdi jabý týraly sotqa talap aryz túsiremiz»,-dedi bilim mekemeleriniń basyn qosqan jıynda OQO TJD basqarma bastyǵynyń orynbasary Baýyrjan Іzbasarov.
Al, bilim salasynyń basshylary bolsa mundaı quraldardy alýǵa bıýdjetten qarajattardyń keshteý bólinetindigimen túsindiredi. Qalaı bolǵanda da ustazdar men tótenshe jaǵdaılar qyzmetkerleri máseleni birlesip sheshýge ýaǵdalasty.
