OQO-da «Órleý» jobasy negizinde aýyl turǵyndaryna shartty aqshalaı kómek berilýde
ShYMKENT. QazAqparat - Ońtústik Qazaqstan oblysynyń Túlkibas aýdanynda «Órleý» pılottyq jobasy negizinde 750 otbasyndaǵy 4500-ge jýyq azamatqa 274,7 mln teńgege shartty aqshalaı kómek berildi. Bul týraly aýdan ákimi Nurbol Turashbekov óńirlik kommýnıkatsııalar qyzmetinde ótken brıfıngte málimdedi, dep habarlaıdy QazAqparat tilshisi.
Nurbol Ábdisattarulynyń sózinshe, ataýly áleýmettik kómek taǵy 610 otbasyǵa taǵaıyndalǵan. Ol úshin respýblıkalyq bıýdjetten 73 mln teńge, aýdandyq bıýdjetten 112,5 mln teńge qarjy qaralǵan. Taýly aýdanda budan bólek shaǵyn jáne orta kásipkerlik nysandary ashylyp, ónim kólemi 9,9 paıyzǵa artqan. Al, aǵymdaǵy jyly jalpy óńirlik ónim mejesin 70 mlrd teńgege jetkizý josparlanyp otyr.
«Aýdanǵa byltyr 18 mlrd. 206 mln. 500 myń teńge ınvestıtsııa tartylsa, ónerkásip kásiporyndary 22 mlrd. 682 mln. 671 myń. teńgeniń ónimin óndirgen. Aýdan boıynsha belsendi shaǵyn kásipkerlik sýbektilerdiń sany 6310 birlikke jetip, óndirilgen ónim kólemi 34,2 mlrd. teńgeni qurady. Al salyq tólemderi 272,6 mln. teńgege jetip, 2,7 paıyzǵa artty», - dedi Nurbol Turashbekov.
Budan ózge, aımaqta «Údemeli ındýstrıaldy-ınnovatsııalyq damý» baǵdarlamasy aıasynda «Óńirler kásipkerligin qoldaý kartasyna» quny 99,4 mlrd teńgelik 10 joba engen. Búgingi tańda quny 1,2 mlrd teńgelik 3 joba júzege asqan. 2018-2020 jyldary jalpy quny 98,2 mlrd teńgeni quraıtyn 7 joba iske qosylyp, 3500-ge jýyq jańa jumys orny ashylady dep kózdelýde. Infraqurlym salasy boıynsha aýdandaǵy 62 eldi mekenniń 59-y tabıǵı gazben qamtylǵan.
Aýdandyq bıýdjetten 55,9 mln teńge bólinip, 10 aýyldyq okrýgke qarasty kóshelerge elektr jelisin tartý úshin jobalyq-smetalyq qujattama ázirlendi. Aýdandaǵy 4 eldi mekenniń aýyz sý júıelerin aǵymdaǵy jóndeýden ótkizýge 60,9 mln teńge qarastyrylyp otyr. «Óńirlerdi damytý» baǵdarlamasy boıynsha eldi mekenderdiń ishki joldaryn jóndeý jáne abattandyrý jumystaryna 106,8 mln teńge bólinip, tolyǵymen ıgerilgen.
