OQO-da Ordabasy taýyn týrızm ortalyǵyna aınaldyrý jumystary júrgizilýde
ShYMKENT. QazAqparat - Ońtústik Qazaqstan oblysynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda birliktiń bastaýy bolǵan Ordabasydaǵy tarıxı qoryqty týrızm ortalyǵyna aınaldyrý jumystary bastaldy. Búginde qurylys jumystary qarqyn alǵan atalǵan jobanyń jumysymen oblys ákimi Janseıit Túımebaev arnaıy baryp tanysyp qaıtty, dep habarlaıdy QazAqparat tilshisi.
Aımaq basshysynyń bastamasymen qolǵa alynǵan joba aıasynda kelýshiler úshin jaıaý júrginshiler jáne avtomobıl joldary men jobanyń ekinshi kezeńinde etnoqalashyq, mýzeı, amfıteatr salý josparlanýda. Osylaısha tarıhı aımaq jańǵyrtyla otyryp, týrıster kelip tamashalaıtyndaı abattandyrylǵan orynǵa aınalmaq.
«Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan tarıhta túrli ról atqarǵan qasıetti oryndardy qolǵa alyp, ony damytý arqyly keleshek urpaqtyń boıyna sińirý jáne sonyń aıasynda otandyq týrızmdi de damytý qajet. Al Ordabasy taýy - halyq kelip demalatyn oryn bolýy kerek. Sondyqtan da mundaǵy árbir jumysqa nazar salyp, qurylysty sapaly júrgizýdi tapsyramyn»,-dedi oblys ákimi.
Aıta keteıik, oblystyq sáýlet jáne qala qurylysy basqarmasynyń málimetinshe, jalpy qoryq aýmaǵynda josparlanǵan jobalaý jumystary 85,9 gektardy qamtıdy. Onyń ishinde jaıaý júrginshilerge arnalǵan joldyń uzyndyǵy 2415,4 metrdi, al avtomobıl jolynyń uzyndyǵy 3129,5 metrdi quraıtyn bolady.
