OQO-da Orbulaq shaıqasynyń 375 jyldyǵyna oraı halyqaralyq konferentsııa ótýde
ShYMKENT. QazAqparat - Ońtústik Qazaqstan oblysyndaǵy M.Áýezov atyndaǵy ýnıversıtette «Ult tarıhyndaǵy Orbulaq shaıqasy: Uly jeńistiń aqıqaty jáne mańyzy» atty halyqaralyq ǵylymı-teorııalyq konferentsııa ótýde, dep habarlaıdy QazAqparat tilshisi.
Plenarlyq májiliske «Jeti jarǵy jáne Qojabergen jyraý» halyqaralyq qaıyrymdylyq qorynyń tóraǵasy men elimizdiń jáne Ózbekstan, Qyrǵyzstannyń birqatar ýnıversıtetteriniń professorlary, belgili aqyn-jazýshylar men jýrnalıster qatysyp otyr.
Bul basqosýdyń ereksheligi - qazaq memlekettiliginiń tutastyǵyn saqtaýdaǵy aıryqsha oryn alatyn Orbulaq shaıqasy jaıly halyqaralyq deńgeıdegi ǵylymı jıynnyń óńirde alǵash ret ótýi bolyp otyr. Jıynda sóz alǵan Ońtústik Qazaqstan oblysynyń ákimi Janseıit Túımebaev Orbulaq shaıqasynyń mańyzyna toqtaldy.
«Elbasymyz «Tarıhty tanyp, zerdeleý kerek, tarıhty tarazylaý qajet, sonda taǵdyryńdy, búgingi turpatyńdy tanısyń, keleshegińdi baǵdarlaısyń, aldaǵy júrer jolyńnyń silemin tabasyń» degen bolatyn. Tarıhta erekshe iz qaldyrǵan qazaq halqy úshin azattyq jolynda Uly jeńisterdiń biri jáne biregeıi - Orbulaq shaıqasy. Bul - ulttyq tarıhtyń jaýyngerlik dańq shejiresinde erlik pen qaharmandyqtyń jáne otanshyldyqtyń ónegesi bolyp aıshyqtalyp qaldy. Búgingi ǵylymı jıyn Orbulaq shaıqasyndaǵy Uly jeńiske 375 jyl tolýyna oraı uıymdastyrylyp otyr», - dedi Janseıit Qanseıituly.
Ǵylymı-teorııalyq konferentsııada Sh.Ýálıhanov atyndaǵy Tarıh jáne etnologııa ınstıtýtynyń dırektory Zııabek Qabyldınov «Orbulaq shaıqasynyń álemdik tarıhı mańyzy» atty baıandama jasady. Sondaı-aq, Respýblıkalyq «Ardagerler uıymy» tóraǵasynyń birinshi orynbasary Ómirzaq Ozǵanbaev «Orbulaq shaıqasyndaǵy Uly jeńis jáne rýhanı jańǵyrý tarıhı sabaqtastyǵy» týraly aıtyp ótti.
Aıta keterligi, Orbulaq shaıqasy - qazaq halqynyń jońǵar shapqynshylyǵyna qarsy uzaqqa sozylǵan azattyq soǵystarynyń biri. Bul 1643 jyldyń jazynda Salqam Jáńgirhan basqarǵan 600 qazaq jaýyngeri men 50 myń jońǵar qolyn basqarǵan Batyr qontaıshy arasyndaǵy shaıqas. Tarıhı derekterge súıensek, qazaq jaýyngerleri jońǵardyń 50 myń áskerin Orbulaq tusynda toqtatyp, 10 myń áskerin joıǵan. Keıinnen Jáńgirhanǵa 20 myń qoldy bastaǵan Jalańtós batyr kómekke kelip, oısyraǵan jońǵarlardy keıin sheginýge májbúr etken.
