OQO-da Oraza aıynda jalǵyzilikti qarttardyń baspanasy kúrdeli jóndeýden ótti
ShYMKENT. QazAqparat - Ońtústik Qazaqstan oblysy, Otyrar aýdanynda Oraza aıynda «Qaıyrymdylyq - asyl qasıet» atty qaıyrymdylyq aktsııasy uıymdastyryldy. Shara barysynda arnaýly áleýmettik kútimdi qajet etetin jalǵyzilikti qarttardyń baspanalary kúrdeli jóndeýden ótti, dep habarlaıdy QazAqparat tilshisi.
Aýdan ákimi Erlan Aıtahanovtyń bastamasymen bir top kásipkerler men zııaly qaýym ókilderi atalǵan qarııalardy qasıetti Aıt merekesi qarsańynda quttyqtap, shańyraqtaryna bas suqty.
«Saýapty iske Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy muryndyq boldy. Aýdandyq bıýdjetten arnaýly áleýmettik kútimde jalǵyzilikti qart esebinde turatyn 5 azamattyń úıin jóndeý úshin árqaısysyna 200 myń teńge bólingen bolatyn. Árıne, bul qarajattyń jetimsiz ekendigi belgili. Otyrarda kásibin dóńgeletip otyrǵan jany jomart, qoly ashyq kásipkerler az emes. Oraza kezinde bastalǵan osy iske jumyla kirisken azamattar az ýaqytta jóndeý jumystaryn aıaqtady. Rýhanı qundylyqtarymyzdyń biri «Asar» ádisiniń jańǵyrýyn, qıyndyq kórgen aýyldastaryna járdemdesýdi paryzym dep biletin qazaqy qalpymyzdy kórip otyrmyz. Adamdarǵa qýanysh syılaıtyn osyndaı aktsııa keleshekte de jalǵasyn tabady»,- dedi aýdan basshysy Erlan Aıtahanov.
Baspanalary jóndeýden ótken qazynaly qarttar ıgilikti iske alǵystaryn jetkizdi. Aq batalaryn berip, elge amandyq, jurtqa tynyshtyq, aýdan basshysy men halyqqa máńgilik shýaqty kúnder tiledi.
«Qarttyq jeńip, baspana jaıyn jóndeýge kúsh-qýat jetpeı otyrǵan shaqta qoldaý bildirip, meıirimin tanytqan aýdan basshysy bastaǵan barsha izgilikti el azamattaryna aıtar alǵysym mol. Keń peıildi halqyma da rızamyn. Barshańyzǵa eki dúnıeniń baqytyn násip etsin!»,-dedi Talapty aýylynyń turǵyny Dúısenkúl Óskenbaeva.
Zeınetkerlerge aýdan ákimi sondaı-aq arnaıy syı-sııapattar tabys etti. Qartyna demeý bola bilgen otyrarlyqtar ıgilikti bastama aldaǵy ýaqytta da jalǵasyn tabatyndyǵyn jetkizdi.
