OQO-da opera teatrda klassıkalyq romanstar men qazaq ánderi shyrqaldy
ShYMKENT. QazAqparat - Ońtústik Qazaqstan oblystyq opera jáne balet teatrynda «Altyn kúz» romans keshi ótti. Onda úzdik klassıkalyq romanstar men qazaq án óneriniń injý-marjandary oryndaldy, dep habarlaıdy QazAqparat tilshisi.
Poezııamen ásem saz úılesimdi úndestik tapqan týyndylar pıanınonyń súıemeldeýimen oryndaldy. Keshte kórermenge esimi etene tanys teatr ártisteri Qaırat Qulynshaqov, Alekseı Skıbın bastaǵan jıyrma ánshi óner kórsetti. Eshqashan eskirmeıtin janr ár alýandyǵymen tyńdarmanyn tańdandyrdy.
Jalpy, romans - kez-kelgen qaǵyp alyp áýelete ketetin ońaı janr emes. Sondyqtan, mádenıet maıtalmandary bul keshke tyńǵylyqty daıyndalǵandaryn aıtady.
«Negizinde romans mınıatıýra túrine jatady. Ol óte qıyn. Óıtkeni bir kishkentaı shyǵarmanyń ishinde sóz arqyly, mýzyka arqyly mazmunyn jetkizý kerekpiz. Sondyqtan bul janrdy daıyndaý óte qıyn. Oǵan ýaqytta kóp keted»,- deıdi oblystyq opera jáne balet teatrynyń kontsertmeısteri Aıgúl Aıǵazıeva.
Aıta keteıik, Eýropada erteden tamyr jaıǵan bul óner, qazaq topyraǵyna HH ǵasyrdyń 30-shy jyldary jetti. Baı mýzykalyq muramyz ár jyldary Abaı óleńderine jazylǵan romanstarmen tolyqty. Jasyratyny joq, qazaqy qoǵamda bul ónerdiń tyńdarmandar qatary qalyń emes. Áıtsede, osyndaı óner keshterinen qalys qalmaı, qulaqtan kirip boıdy alar týyndylardy jany qalaıtyn jandar da az emes.
«Ózim operany óte jaqsy kórgennen keıin osyndaı keremet án keshterine jıi kelip turamyn. Kelip otyrǵan kezińde bir aıdyn kóldiń janynda, kók maısada, samal jel soǵyp turǵandaı áser alasyń. Janyń tynyshtalady. Qazir aıtady ǵoı stress, nervnaıa sıstema, anaý-mynaý deıdi. Osyndaı keshterge kóbirek keletin bolsa, stressti de umytamyz, janymyzda lázzat alady», - deıdi qala turǵyny Zeınash Qaldybekqyzy.
