OQO-da «Ońtústik ónimi» baıqaýy bastaldy
ShYMKENT. QazAqparat - Ońtústik Qazaqstan oblysynda «Ońtústik ónimi» baıqaýy bastaldy. Baıqaýdy maqsaty týraly óńirlik kommýnıkatsııalar qyzmetinde ótken brıfıngte Oblystyq ishki saıasat basqarmasy basshysynyń orynbasary Baqyt Ahymbetov aıtyp berdi, dep habarlaıdy QazAqparat tilshisi.
Elbasynyń Qazaqstan halqyna arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri atty» Joldaýyndaǵy ındýstrııalandyrý, jańa tehnologııalardy engizý baǵyttary aıasynda uıymdastyrylǵan shara óńirdiń tól ónimderin kórsetip, nasıhattaý baǵytynda ótýde. Ári bul baıqaýǵa kez-kelgen áleýmettik jeli qoldanýshylary, jýrnalıster men blogerler qatysa alady.
Baqyt Ahymbetovtyń aıtýynsha, baıqaýǵa qatysýshylar óz ótinimderin 15 naýryzǵa deıin oko-ato@mail.ru elektrondy poshtasyna joldaýy qajet. Áleýmettik jelidegi Facebook, Vkontakte, Instagram paraqshalarynyń birinde talapqa sáıkes oblystaǵy óndiris oryndary týraly jazba jarııalaýy kerek. Sondaı-aq, sol jazylǵan mekeme basshylyǵymen sýretke túsýi mindetti.
«Baıqaýdyń bas júldegeri 300 myń teńgeni ıelense, 1 orynǵa 200 myń teńge, 2 orynǵa 150 myń teńge, 3 orynǵa 100 myń teńge. Sondaı-aq, yntalandyrý syılyqtary bar. Baıqaýdyń qorytyndysy maýsym aıynyń úshinshi onkúndiginde jarııalanady. Bul jobaǵa qatysýshy óndiris basshylyǵymen qysqasha suhbat uıymdastyryp, óndiris týraly keminde 4 fotodan turatyn fotoreportaj jáne óndiris jaıly tolyqqandy aqparat berýi kerek. Jalpy jazba 500 belgiden kem bolmaýy qajet. Árbir qatysýshy keminde 25 jarııalanym jasaıdy», - dedi Baqyt Sərsenbaıuly.
Sonymen qatar, spıker mindetti túrde jarııalanymdar Facebook áleýmettik jelisindegi «Ońtústikten ne habar» tobynda #Ońtústikónimi heshtegimen jarııalanýy tıis ekenin eskertti. Mátindik materıaldy «Ońtústik ónimi...» sózderimen bastalyp, baıqaý ataýy men logotıpi paıdalanylady.
Aıta keterligi, baıqaýǵa eki tilde jarııalanǵan materıaldardyń skrınshottaryn qatysýshylar 10-15 maýsym aralyǵynda tapsyrýy tıis. Al, jeńimpazdardy anyqtaıtyn komıssııa quramyna BAQ ókilderi men memlekettik organdardyń jáne úkimettik emes uıymdardyń ókilderi enip otyr.
