OQO-da «ONTUSTIK ónimderi-2017» kórme-jármeńkesi ótýde
ShYMKENT. QazAqparat - Búgin Shymkenttegi «Kórme» ortalyǵynda «ONTUSTIK ónimderi-2017» kórme-jármeńkesi bastaldy. Ońtústik Qazaqstannyń taýar óndirýshilerin qoldaý jáne olardy halyqqa keńinen tanystyrýdy maqsat tutqan sharada kúngeıde óndiriletin tamaq, farmatsevtıka, mashına jasaý, hımııa, qurylys salasyna qatysty 200-den astam taýar óndirýshi qatysty, dep habarlaıdy QazAqparat tilshisi.
Ońtústik óńirde turmysqa qajet ónimniń 500-den astam túri shyǵarylady. Eki kúnge ulasatyn kórme-jármeńkege taýarlardyń 250-ge jýyq túri qoıylǵan.
«Bul kórmege qatysyp otyrǵan sebebimiz, medıtsınalyq jabdyqtardy halyqqa kórsetý bolyp otyr. Jáne ózimizdiń aýrýhana, emhanalarǵa qural-jabdyqtarymyzdy kórsetip, olarmen tyǵyz qarym-qatynas ornatý. Búgingi kúnniń ózinde bizben baılanys jasap, taýarlarymyzǵa tapsyrys túsip jatyr»,-deıdi «Qazmedprıbor» JShS-niń ınjeneri Qasym Qatashov.
Sharada ońtústiktiń taýar óndirýshileri tek óz taýarlaryn usynyp qana qoımaı, sharaǵa kelýshilerimen bos oryndar týraly aqparatpen bólisip, qyzyǵýshylyq tanytqandarmen áńgimelesti. Bul aımaqtaǵy jumyssyzdar men oqýdy jańa bitirgen túlekterge óńirdegi kompanııalarmen tanysyp, ózderine turaqty jumys oryndaryn tabýǵa zor múmkindik boldy. Sondaı-aq, atalǵan shara barysynda «Qazaqstannyń úzdik taýary» atty óńirlik baıqaý ótkizilýde. Onda «Halyq úshin úzdik taýar», «Óndiristik baǵyttaǵy úzdik taýar» jáne «Úzdik azyq-túliktik taýar» nomınatsııalary boıynsha úzdikter anyqtalady. Sarapshylar taýardyń sapasy men básekege qabilettiligin eskeretin bolady.
Sonymen qatar, «Halyqtyń tańdaýy», «Jyl serpini», «Jyl brendi», «Áleýmettik mańyzdy startap» ataǵymen eń úzdik kompanııalar anyqtalady. Jeńimpazdarǵa Astanada ótkiziletin respýblıkalyq «Qazaqstannyń úzdik taýary» kórme-konkýrsyna qatysýǵa joldama berilip, qatysýshylarǵa syılyqtar tabystalady.
