OQO-da óńirlik úılestirý keńesiniń otyrysy ótti
ShYMKENT. QazAqparat - Ońtústik Qazaqstan oblysy ákimdiginde oblys ákiminiń birinshi orynbasary Darhan Satybaldynyń tóraǵalyǵymen «Nurly jer» baǵdarlamasyn iske asyrý boıynsha «Óńirlik úılestirý keńesiniń» alǵashqy otyrysy ótti. Jıynǵa oblys jáne qala ákimdiginiń ókilderi men salaǵa jaýapty basqarma basshylary, ekinshi deńgeıli bank ókilderi, qurylys salýshy kompanııalar qatysty, dep habarlaıdy QazAqparat tilshisi.
Otyrysta sóz alǵan oblys ákiminiń birinshi orynbasary «Nurly jer» baǵdarlamasy aıasynda jeke qurylys salýshylardy turǵyn úı salýǵa shaqyryp, búginde qurylysyn bastaǵan birqatar kompanııalardyń usynǵan turǵyn úı jobalaryna ózgerister engizý qajettigin aıtty.
Atalǵan baǵdarlama sheńberinde jeke qurylys salýshylar tarapynan usynysty yntalandyrý maqsatynda ekinshi deńgeıli bankterge (EDB) nesıe berý kólemderin keńeıtý arqyly qurylys kompanııalaryn qarjy resýrstarymen qamtamasyz etý qaralǵan. Osy maqsatta jeke qurylys salýshylarǵa EDB beretin nesıeler boıynsha syıaqy mólsherlemelerin sýbsıdııalaý quraly engizilip otyr. Máselen, 2017 jyldan bastap, respýblıkalyq bıýdjetten jyl saıyn nesıe berý mólsherlemesiniń 7%-ne deıin sýbsıdııa bólinetin bolady jáne ol «Damý KDQ» AQ qarjy agenttigi arqyly beriledi.
Kredıt berý úshin oń qorytyndy alǵan jeke qurylys salýshy baǵdarlamaǵa qatysýshy retinde «Óńirlik úılestirý keńesine» (ÓÚK) ótinish jasaıdy. Keńestiń hattamasynyń negizinde EDB, jeke qurylys salýshy men «Damý KDQ» AQ arasynda úsh jaqty kelisim jasalady. Sonyń aıasynda sýbsıdııa tóleý sharasy qamtamasyz etiledi.
