OQO-da ónerkásip óniminiń kólemi 6,8 paıyzǵa artty
ShYMKENT. QazAqparat - Búgin Ońtústik Qazaqstan oblysy ákimdiginde oblys ákimi Janseıit Túımebaevtyń tóraǵalyǵymen selektorlyq rejimde apparattyq májilis ótti, dep habarlaıdy QazAqparat tilshisi.
Jıyn barysynda 2018 jylǵy 1 toqsandaǵy áleýmettik-ekonomıkalyq damý qorytyndysy jáne ekonomıkanyń nysanaly ósý ındıkatorlarynyń oryndalý barysy qaraldyBirinshi toqsan qorytyndysy boıynsha oblysta negizgi makroekonomıkalyq kórsetkishteriniń ósimi oryn alǵanyn aıtqan óńirdiń ekonomıka jáne bıýdjettik josparlaý basqarmasynyń basshysy Arman Sábıtov ónerkásip óniminiń kólemi 216,8 mlrd teńgeni qurap, ótken jyldyń sáıkes kezeńimen salystyrǵanda 6,8 paıyzǵa artqanyn málim etti.
«Jumys istep turǵan shaǵyn jáne orta kásipkerlik sýbektileriniń sany 180 818 birlikti qurap, ótken jylmen salystyrǵanda 3,4 paıyzǵa, al aýyl sharýashylyǵynyń jalpy ónim kólemi 69,4 mlrd teńgeni qurap, 2017 jyldyń sáıkes kezeńimen salystyrǵanda 3,4 paıyzǵa artqan. Budan bólek, oblysqa 207,3 mlrd teńge ınvestıtsııa baǵyttalyp, 2,5 esege ósti. Bul kórsetkish boıynsha oblysymyz respýblıkada alǵashqy orynda, úlesi jaǵynan 2-orynda»,-dedi basqarma basshysy.
Baıandamada málim bolǵandaı óńirde jyl basynan beri jalpy alańy 198 myń sharshy metrdi quraıtyn turǵyn úı paıdalanýǵa berilgen bolsa, osy ýaqyt aralyǵynda 2 428 jańa jumys orny ashylǵan.
Kún tártibindegi ekinshi másele boıynsha baıandama jasaǵan Oblystyq qarjy basqarmasynyń basshysy Abdrahman Tasybaev birinshi toqsanda jergilikti bıýdjetke 31,8 mlrd. teńge túsip, kirister jospary 114,6 paıyzǵa oryndalǵanyn atap ótti.
Baıandamashylardy muqııat tyńdaǵan aımaq basshysy Elbasynyń jarııalaǵan bes áleýmettik bastamasynyń oryndalýyn turaqty túrde baqylaýdy jáne ındıkatorlardyń oryndalýy boıynsha jumystardy kúsheıtýdi tapsyrdy. Sonymen qatar, barlyq aýdan, qala ákimderi men tıisti sala basshylaryna tereń óńdeý isi men abattandyrýdy qolǵa alýdy jáne ár apta senbilik uıymdastyrýdy júktedi. Budan basqa ákim halyqty eńbekke jumyldyrý máseleleri men memlekettik qyzmettiń sapasyn jaqsartý jaıyna basa nazar aýdardy.
