OQO-da óndiriletin maqta talshyǵynyń joǵary suryptary 10 memleketke eksporttalýda
ShYMKENT. QazAqparat - Ońtústik Qazaqstan oblysynyń sharýalary 328 myń tonna shıtti maqta jınady. Sharýalardyń mańdaı termen jınaǵan ónimderi ótken jylmen salystyrǵanda 41 myń tonnaǵa artyq bolyp otyr, dep habarlaıdy QazAqparat tilshisi.
Sala mamandarynyń sózinshe, aq altynnyń ortasha túsimdiligi gektaryna 24,5 tsentnerdi quraǵan. Jınalǵan 196,6 myń tonna ónim nemese 60 paıyzy arnaıy tehnıkamen terildi. ıAǵnı, maqta alqaptarynda 500 den astam kombaın terý jumystaryn júrgizdi. Búginde jıyn-terim naýqany tolyǵymen aıaqtaldy.
Elimiz boıynsha aq altyn tolyqtaı Ońtústikte óndiriledi. Al, maqta daqylyn ósirýmen oblystaǵy 10 aýdannyń sharýalary aınalysyp keledi. Maqta daqyly eksporttyq mańyzǵa ıe bolǵandyqtan egis kólemi jyldan jylǵa artýda. Máselen, bıyl Ońtústikte 134,6 myń ga jerge shıtti maqta egilse, bul ótken jylmen salystyrǵanda 25 myń ga artyq. Kóktemniń kesh túsýi men aýa raıynyń qolaısyzdyǵyna baılanysty bıyl maqta terý jumystary qarasha aıynyń 20-syna deıin sozyldy.
Maqtaaral aýdanyna jasaǵan bir saparynda oblys ákimi Janseıit Túımebaev Ońtústik Qazaqstan oblysynyń brendi sanalatyn maqta daqyly básekege qabiletti bolý qajettigin aıtqan bolatyn. Sondaı-aq, ol elimizdegi úlken tabys ákeletin júz jyldyq tarıhy bar maqta daqylynyń sapaly sorttaryn damytyp, ınnovatsııalyq tehnologııalardy óndiriske endirý arqyly aq altyndy óndirýdiń tıimdiligin arttyrýdy aıtqan-dy. Búginde aımaqta óndiriletin maqta talshyǵynyń joǵary suryptary Reseı, Belarýs, Germanııa, Latvııa, Moldova, QHR, Belgııa, Iran, Ýkraına, Italııa jáne Ońtústik Koreıa syndy 10 memleketke eksporttalýda. Jyl basynan beri atalǵan elderge 30 myń tonnaǵa jýyq maqta talshyǵy jóneltilgen.
Maqta sharýashylyǵyn qoldaýǵa memleket tarapynan erekshe nazar aýdarylǵan. Maqta daqylyn ósirý úshin tyńaıtqyshtar men gerbıtsıtterge sýbsıdııa beriledi. Odan bólek, egilgen maqtanyń árbir gektaryna 15 myń teńgeden, al qaıta óńdeý úshin ótkizilgen aq altynnyń ár tonnasyna 6 myń teńgeden qarjylaı qoldaý kórsetiledi. Búginde maqta sharýashylyǵyn qoldaý úshin sýbsıdııalar taratylýda. Jyl basynan beri oblys boıynsha 134,6 myń gektarǵa 2 mlrdqa jýyq, qaıta óńdeý kásiporyndaryna ótkizilgen 140 myń tonna aq altynǵa 833 mln teńge sýbsıdııa tólengen.
