OQO-da oqýshylar kitaphana men kıim iletin jerde oqyp jatyr
ShYMKENT. QazAqparat - Ońtústik Qazaqstan oblysynda mekteptiń jóndeý jumystary keshigip, sonyń saldarynan oqýshylar kitaphana men kıim iletin jerde oqyp jatyr. Kúndelikti sabaq kestesinen qalyp qoımaýdyń qamyn oılaǵan ustazdar amalsyz osyndaı qadamǵa barýǵa májbúr, dep habarlaıdy QazAqparat HAA tilshisi.
Saıram aýdanyna qarasty Qutarys aýylyndaǵy 600 oryndyq mektep bıyl kúrdeli jóndeýden ótýi tıis bolǵan. Sebebi, irgetasy ótken ǵasyrdyń 70-jyldary qalanǵan bilim uıasynyń ábden tozyǵy jetken. Alaıda, erte kóktemdegi tender ótkizý kezinde eki kompanııa talasyp, tipti sottasyp qalǵan. Baıqaý birneshe ret qaıta ótkizilip, jóndeý jumysynyń kestesin keıinge shegerýge týra kelgen. Sonyń saldarynan jóndeý jumystary bir jarym aıǵa keshigip bastalypty.
«Tenderdi osy jyldyń sáýir aıynda jeńip alǵanbyz. Biraq sol arada kedergiler boldy. Sóıtip qurylysty bir jarym aıǵa keshigip, maýsym aıynda bastadyq. Bir blogty jańa oqý jylynda tapsyrdyq. Ekinshi bloktyń kúrdeli jóndeý jumystaryn qazan aıyna deıin tapsyrýdy kózdep otyrmyz»,-deıdi merdiger kompanııanyń is júrgizýshisi Baýyrjan Baımamanov.
Qazir mektep ǵımaratynyń bir bóliginde áli jóndeý jumystary júrgizilip otyr. Ol azdaı janynan qosymsha jańa ǵımarat salynýda. Jan jaǵy qurylys júrip jatqanyna qaramastan bilim uıasynda balalar qysylyp - qymtyrylyp oqýda. Mektep dırektorynyń oqý isi jónindegi orynbasary Qulajan Nurashevtyń aıtýynsha, qazir 13 bastaýysh synyby úsh aýsymǵa aýystyrylǵan. Ustazdar kitaptar men basqa da zattardy tolyqtaı sport zalǵa kóshirgen. Sebebi kitaphana da, muǵalimder bólmesi de, tipti kıim sheshetin oryn da synyp bólmeleri retinde paıdalanylyp otyr. Qurylys jumystarynyń kesheýildeýi bir ǵana oqýshylarǵa ǵana emes, ustazdarǵa da ońaı soqpaı tur. Muǵalimder bólmesine sımaǵandyqtan, teń jartysy korrıdorda otyrýǵa májbúr.
Mektep basshylyǵy ekinshi ǵımarattaǵy jóndeý jumystary aıaqtalǵanymen de balalar úsh aýsymmen oqı beredi dep otyr. Óıtkeni ekinshi blok mektep ákimshiligine arnalǵan. Tek, birinshi qabatynda eki synyp bólmesi bar, onyń ózinde eńbekke arnalǵan. Al, mektep janynan salynyp jatqan jańa qosymsha ǵımarat keler jyly paıdalanýǵa beriledi dep josparlanǵan. Sondyqtan, oqýshylardyń 2 aýsymda bilim alýy tek keler jyly ǵana sheshilmek.
