OQO-da ógeı sheshesinen qorlyq kórgen jasóspirimniń anasy kúıeýinen 15 jyl taıaq jegen
ShYMKENT. QazAqparat - Ońtústik Qazaqstan oblysynda ógeı sheshesinen qorlyq kórgen 14 jastaǵy Dıana Esenovanyń anasy kúıeýinen ábden zábir kórgenin aıtady. Ol burynǵy kúıeýimen turǵan 15 jyldyń ishinde talaı ret taıaq jep, azapty kúnderdi ótkizipti, dep habarlaıdy QazAqparat HAA tilshisi.
Tórt balanyń anasy Rysgúl Jolanovanyń sózinshe, kúıeýi únemi iship kelip, tepkilep kelgen. Aýyr soqqydan denesi talaı márte zaqymdanypty. Balalary úshin bul qorlyqqa shydap-aq baqqysy kelgenimen, tózimi taýsylǵasyn ol amalsyz ajyrasýǵa sheshim qabyldaǵan. Erli-zaıyptylar byltyr qazan aıynda ekige aıyrylǵanda Dıana men ápkesin ákeleri alyp qalypty. Dúnıe-múlik pen bar jıǵan-tergenderin de otaǵasyna ótken. Qazir kelinshek Shymkentte ózge eki balasymen páter jaldap kúneltip júr.
"Bizdiń ústimizge talaı benzın shashty, pyshaqpen de qorqytty, KaMAZ-dyń astyna basylyp qala jazdadym. Sóıtip bir ólimnen qalǵanmyn. Qala berdi tún jarymda balamdy besigimmen birge shyǵaryp tastaǵan kezderi boldy. Men kórgen azapty kúnderdi endi qyzdaryma kórsetip jatyr», - deıdi ashynǵan ana.
Eske salaıyq, kúni keshe ǵana Saryaǵash aýdanynda turatyn jasóspirim Dıana Esenova ógeı anasynan ábden qorlyq kórgenin aıtyp, kómek suraǵan bolatyn. Onyń sózinshe ákesiniń ekinshi áıeli ár nárseni bir syltaý etip, uryp-soǵady eken. Kún saıyn tańnan keshke deıin jumys isteýge májbúrlegen. Sóıte tura, durystap tamaq ta bermeı, ash-jalańash kóshede qalǵan kúnderi bolǵan. Onyń ógeı sheshesi Ózbekstannyń týmasy, ári alǵashynda ákesi men anasynyń shańyraǵyna úı qyzmetshisi bolǵan kórinedi. Sóıtip júrip otaǵasynyń kóńilin tapqan. «Esikten kirip, tór meniki» degen ol aqyr sońynda ata-anasyn aıyryp tynypty. Týǵan anasy ketkeli talaı qorlyqty kórgen qyz qazir oblystyq jasóspirimderdi beıimdeý ortalyǵyna ornalastyrylǵan.
Al qyzdaryna kún kórsetpedi degen ana ógeı sheshe laıyqty jazasyn alsa deıdi. Ádildik izdep Saryaǵash aýdandyq ishki ister basqarmasyna da hat jazypty. Alaıda, quzyrly organ ázirge eshbir jaýap qatpaǵan.
