OQO-da Ógem ózeninen taza sý alý jumystary bastaldy
ASTANA. QazAqparat - Ońtústik Qazaqstan oblysynyń ákimdigi men túrkııalyq «DOGUS» Constraction kompanııasy arasynda «Ógem» ózeniniń sýyn burý maqsatynda yntymaqtastyq memorandýmy jasaldy. Endi atalǵan sheteldik kompanııa ókilderi osy ýaǵdalastyq aıasynda tujyrymdama ázirlemek. Bul jumystar 2018 jyldyń qańtaryna deıin aıaqtalsa, odan keıin jobanyń tehnıkalyq ekonomıkalyq negizdemesi (TEN) men jobalaý-smetalyq qujattamasyn (JSQ) ázirleý jumystarynyń kezeńderi bastalady, dep habarlaıdy QazAqparat OQO ákimdigine silteme jasap.
Túrik kompanııasynyń ókilderi oblys ákimi Janseıit Túımebaevty jobamen tanystyryp, «DOGUS» Constraction kompanııasynyń Qazaqstandaǵy ókili ıÝnýs Emre Sýdjý men oblys ákiminiń birinshi orynbasary Darhan Satybaldynyń arasynda atalǵan qujatqa qol qoıyldy. 
Oblystyq energetıka jáne turǵyn úı-kommýnaldyq sharýashylyǵy basqarmasy mamandarynyń málimetinshe, joba iske asqanda Ógem ózeninde gıdrotehnıkalyq nysan salynyp, odan úsh aýdanǵa - Saryaǵash, Maqtaaral jáne Qazyǵurtqa 3-3,5 m3/sek kólemde sý tartylady. Odan soń, tartylatyn sýaǵarlar boıynan kishi sý elektr stansalary boı kóterip, 51,7 MVt elektr qýaty alynady dep kútilýde.
Sonymen qatar, atalǵan joba iske asqan jaǵdaıda, oblystyń Qazyǵurt, Saryaǵash jáne Maqtaral aýdandarynyń 400-ge jýyq eldi mekenindegi 700 myńnan asa turǵyn sapaly aýyz sýmen qamtamasyz etilip, aýyz sýǵa baılanysty másele tolyq sheshimin tabady.
Eske salaıyq, «Ógem» ózeni kórshiles Ózbekstannyń aýmaǵynda ishinara ornalasyp, transshekaralyq ózender qataryna jatqandyqtan, osy jyldyń aqpanynda Qazaqstan men Ózbekstan Respýblıkalary Úkimetiniń birlesken jumys toby bas qosqan bolatyn. Onda qos eldiń ókilderi ekijaqty yntymaqtastyqty jetildirý máseleleri boıynsha otyrysynda «Ógem» ózeniniń sýyn burý kelisilgen bolatyn.
