OQO-da oblys ákiminiń orynbasary Maqtaral aýdanyndaǵy zııankestermen kúres baǵytyndaǵy jumystarmen tanysty
ShYMKENT. QazAqparat - Taıaýda oblys ákiminiń orynbasary S.Tuıaqbaev Maqtaral aýdanynda bolyp, ondaǵy sharýalarmen kezdesti. Maqta ekken qojalyq ıelerimen bolǵan jıynda oblys deńgeıinde ósimdikti qorǵaý, onyń ishinde zııankesterge qarsy kúres baǵytynda atqarylyp jatqan jumystardyń nátıjesimen tanysty. Bul týraly oblys ákimdiginiń baspasóz qyzmeti habarlady.
Búgingi tańda Ońtústik Qazaqstan oblysynda 109 myń gektar jerge shıtti maqta egilse, sonyń 83 myń gektary Maqtaral aýdanyna tıesili. Maqta kóbelegi men órmekshi kenesinen egistikti qorǵaý maqsatynda qazirgi tańda ondaǵy qaýipti aımaq dep sanalǵan 56 myń gektar jerge bıologııalyq tásil qoldanylyp, jumystardyń birinshi kezeńi aıaqtalǵan. Jumysty jalǵastyrýdyń ekinshi kezeńi aldaǵy 1-2 aptada bastalady. Bıotásil qoldanǵan sharýalarǵa aldymyzdaǵy aptadan bastap sýbsıdııa berile bastaıdy. Eske salaıyq, ótken jyly atalǵan tásil ondaǵy 36 myń gektarǵa qoldanylǵan bolatyn.
«Aýa raıyna baılanysty basqa jyldarǵa qaraǵanda bıyl qaýip-qater deńgeıi joǵary dep boljam jasaǵan bolatynbyz. Degenmen, bıotásil arqyly atqarylǵan jumystardyń nátıjesinde, qazir jaǵdaı turaqty, eshqandaı qaýip-qater joq. Dese de, zııankesterdiń belsendi fazasy 20 shildeden bastap shyǵady dep boljamdasaq, biz soǵan daıyn bolýymyz kerek. Boljam ortalyǵy órmekshi kenesi boıynsha 15 myń gektarda, kósek qurttary boıynsha 28 myń gektarda qaýip bar degen aqparat bergen. Biraq aldyn alý sharalaryn ýaqytyly qabyldaǵannyń nátıjesinde, bıylǵy boljam alańy odan da az bolýy kerek. Buǵan qaramastan, daıyndyǵymyzdy jasap, qajetti dári-dármek pen tehnıkanyń barlyǵy 15 shildege daıyn turýy kerek. Qajet bolǵan jaǵdaıda tıimdi uıymdastyrý jumystaryn júrgizetin bolamyz», - dedi S.Tuıaqbaev.
Aıta ketý kerek, oblys deńgeıinde aýyl sharýashylyǵy salasynda ǵylym men jańa tehnologııany keńinen qoldaný jyl basynan beri qolǵa alynyp, onyń ishinde ósimdik qorǵaý baǵytynda birqatar jumystar atqarylýda. Bul óz kezeginde sharýanyń jaǵdaıyn edáýir jaqsartyp, tabys kózderin turaqtandyrady.
