OQO-da «Nur Otan» partııasynyń jobasy aıasynda 106 ІT-synyp ashylmaq
ShYMKENT. QazAqparat - Búgin Ońtústik Qazaqstan memlekettik pedagogıkalyq ýnıversıtetiniń bazasynda 6 IT-synyp ashyldy. «Nur Otan» partııalyq jobasy aıasynda ashylǵan synyptarda balalar bilimderin jetildiretin bolady, dep habarlaıdy QazAqparat tilshisi.
Bul synyptar zamanaýı 74 monoblokpen, joǵary jyldamdyqtaǵy ınternetpen, qajetti veb-baǵdarlama men 1 3D prıntermen, 2 mýltımedııalyq podıýmmen jáne qajetti jıhazdarmen jabdyqtalǵan. Jobany júzege asyrý barysynda 2018 jyly - 4 500 bala, 2019 jyly - 9000 bala, 2020 jyly - 9000 bala ІT salasy boıynsha úırenetin bolady. Budan bólek, óńirde «ІT mamandaryn daıyndaý» partııalyq jobasyn júzege asyrý boıynsha jyl aıaǵyna deıin 2 ІT ortalyq ashý kózdelýde.
Atalǵan synyptardyń ashylýyna qatysqan oblys ákimi Janseıit Túımebaev olardyń áleýetine nazar aýdardy. Sonymen qatar, ákim «Nur Otan» partııasynyń jobasy qalada, aýyldarda turatyn balalardy IT-bilimge baýlý úshin júrgizilip jatqanyn aıtyp, jańǵyrýdyń jańa kezeńine aıaq basqan joba tyń bastama ekenin jetkizdi. «Nur Otan» partııasynyń bastamashyl jobalaryn óńirde júzege asyrý maqsatynda arnaıy jelilik keste daıyndalyp, ol aımaq basshysymen bekitilgen bolatyn. Kestege sáıkes oblysta 2020 jylǵa deıin 106 ІT-synyp ashylyp, olardy 100 paıyz materıaldyq tehnıkalyq bazamen jabdyqtaý josparlanǵan. Al osy jyly onyń 26-sy iske asyrylmaq.
Aıta keteıik, qazirgi tańda atalǵan joba sheńberinde IT-ortalyq M.Áýezov atyndaǵy Ońtústik Qazaqstan memlekettik ýnıversıtetiniń bazasynda ashyldy. Ortalyq zamanaýı 16 kompıýtermen, joǵary jyldamdyqtaǵy ınternetpen jáne qajetti veb-baǵdarlamalarmen jabdyqtalǵan.
Endi, «Qazaqstan kitaphanalary - zamanaýı bilim ortalyqtary» - partııalyq jobasyn júzege asyrý maqsatynda jyl sońyna deıin 15 kavorkıng ortalyqtaryn ashý josparlanýda. Budan basqa 233 dana merzimdi basylymdar men 900 dana avtoreferattardy tsıfrlandyrý kózdelýde. Partııalyq jobanyń biri «Úshtildilikke kóshý» boıynsha 9 jazǵy saýyqtyrý lagerleri men 9 aýdan, qala mektepterinde úshtildilikti oqytý josparlanýda.
foto: Myrzalıev Samat
