OQO-da Naýryz merekesi Qazyǵurt bókterinde atalyp ótti
Qazyǵurt taýynyń bókterinde uıymdastyrylǵan «Naýryz Qazyǵurttan bastalady» atty sharanyń basty sahnasy Nuq paıǵambardyń kemesi ispettes bezendirilip, oǵan 1 500-ge tarta ónerpaz qatysty. Al, ony tamashalaýǵa myńdaǵan oblys turǵyndary keldi.
Taý bókterinde 40-tan astam kıiz úı tigilip, altybaqandar men ulttyq oıyndarǵa arnalǵan alańshalar ashyldy. Salt-dástúrlerdi pash etetin arnaıy shaǵyn sahnalarda túrli ult ókilderiniń ánderi shyrqalyp, jurtshylyq etnoaýyl ishindegi qolóner sheberleri men ulttyq taǵamdardyń kórmesin tamashalady.
Saltanatty sharanyń shymyldyǵy «Tirshiliktiń bastaýy - Qazyǵurt» qoıylymymen bastaldy. Bul qoıylymda 230 bıshi horegrafııalyq kompozıtsııa arqyly jer jahandy topan sý basyp, Nuq paıǵambardyń kemesiniń Qazyǵurt taýyna kelgenin pash etti.
Merekelik jıyn budan keıin «Kúnniń jańarýy», «Qydyr atanyń 12 aımen kezdesýi», «Tabıǵattyń oıanýy», «Naýryz toıy», «Rýhanı jańǵyrý - ultty ulyqtaýdyń uly joly», «Táýelsizdik túndigi - Astana» atty sazdy - horeografııalyq kompozıtsııalarymen jalǵasyn tapty. Máselen, «Tabıǵattyń oıanýy» kompozıtsııasynda 500 kógershin kókke ushyrylyp, Naýryz kelgenin plastıkalyq qoıylym arqyly kórermendi tań-tamasha etti.
Al, «Naýryz Qazyǵurttan bastalady» is-sharasyna Oblystyq mádenıet jáne tilderdi damytý basqarmasyna qarasty mádenıet jáne óner mekemeleriniń ártisteri jáne «Shamsınýr», «Farab», «Tumar», «Juldyzdar», «Tańsholpan», «Qarakóz», «Shattyq» bı ujymdary men 500 jylqy, 500 kógershin men túıeli kúımeler qatysty. Shara barysynda Ońtústik Qazaqstan oblysynyń ákimi Janseıit Túımebaev sóz alyp, kópshilikti Naýryz merekesimen quttyqtady.
«Elbasymyz Nursultan Ábishuly Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda «Jańa turpatty jańǵyrýdyń eń basty sharty - sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı», - dep aıtqan sózi bar. Al, ulttyq kod degen qaıda desek, onyń qaınar kózi - áz Naýryzda. Ulystyń uly kúninde qazaq mádenıeti men rýhanııatynyń bar injý-marjany jaryqqa shyǵady. Naýryzda dástúrli án shyrqalyp, kúı shertiledi, terme tógilip, aqyndar aıtysady. Eń bastysy, Naýryzda dástúr boıynsha jastar úlkendermen kórisedi. Ókpe-naz, renishterdiń bári umytylady. ıAǵnı, Naýryz - yntymaq pen birlik, úlkenge qurmet, meıirim men keshirimdilik sekildi izgi qasıetter dáripteletin mereke», - dedi Janseıit Qanseıituly.
Sondaı-aq, aımaq basshysy qaı halyq bolmasyn tek óziniń tarıhy, mádenıeti, óziniń rýhanııaty sheńberinde ǵana damıtynyn, sol erekshelikterimen ǵana órkenıet kóshine ilesetinin aıtty. Jattyń tarıhyn, bótenniń mádenıetin boıyna sińirip, keremet damyǵan, ǵajap jetistikterge jetken memleket jer betinde joq. Ondaı elderdi tek tarıh sahnasynan túsip qalý taǵdyry ǵana kútip turǵandyǵyn jetkizdi. Ol sonymen qatar birqatar azamattarǵa «Ońtústik Qazaqstan oblysynyń Qurmetti azamaty» ataǵyn tapsyrdy. «Týǵan jerdi túletý perzenttik paryzymyz» jobasy aıasynda el yqylasyna bólengen el azamattaryn marapattady.
