OQO-da nashaqorlyqqa jáne esirtki bıznesine qarsy is-qımylǵa baǵyttalǵan semınar keńes ótti
ShYMKENT. QazAqparat - Ońtústik Qazaqstan oblysy Saryaǵash aýdanynda nashaqorlyqqa jáne esirtki bıznesine qarsy is-qımylǵa baǵyttalǵan memlekettik organdardyń qyzmetin úılestirý jónindegi óńirlik vedomstvoaralyq shtabynyń semınar keńesi bolyp ótti. Keńestiń kún tártibinde shtabtyń jumysyn odan ári jetildirý jáne jandandyrý máselesi qaraldy, dep habarlaıdy QazAqparat tilshisi.
Semınar keńeske nashaqorlyq jáne esirtki bıznesine qarsy is-qımylǵa baǵyttalǵan memlekettik organdardyń qyzmetin úılestirý jónindegi vedomstvoaralyq shtab músheleri, qala, kent, aýyl jáne aýyldyq okrýg ákimderiniń atalǵan salaǵa jaýapty mamandary qatysty. Jıynda aýdan ákiminiń orynbasary, nashaqorlyq jáne esirtki bıznesine qarsy is-qımylǵa baǵyttalǵan memlekettik organdardyń qyzmetin úılestirý jónindegi vedomstvoaralyq shtab tóraǵasy Qudiret Qystaýbaev sóz sóılep, ózekti máselege toqtaldy. Oblysta nashaqorlyqqa jáne esirtki bıznesine qarsy kúrestiń 2016-2020 jyldarǵa arnalǵan damý baǵdarlamasyn iske asyrý boıynsha is-sharalar josparlardy tarqatyp aıtty. Osyǵan oraı, jospardy sapaly oryndaý úshin shtabqa múshe vedomstvolardyń ózara birlesken is-áreketterin odan ári jetildirý jaıyn sóz etti. Josparǵa sáıkes, jyl aıaǵyna deıin aýdandaǵy qala, kent, aýyl jáne aýyldyq okrýgterde aýdannyń narkology, aýdandyq ishki ister basqarmasy esirtki bıznesine qarsy kúres tobynyń jedel ýákili, aýdandyq salaýatty ómir saltyn qalyptastyrý ortalyǵynyń dárigerleri turǵyndarmen kezdesý ótkizetin bolady. Ol basqosýlardyń tıimdi bolýy úshin aýyldyń kózi qaraqty aqsaqaldary men bılerin, zııaly qaýym ókilderi men mektepterdiń tárbıe isi jónindegi dırektorlaryn, psıhologtar men ýchaskelik polıtsııa ınspektorlaryn, jumyssyz jastardy kezdesýge qatystyrý tapsyryldy.
