OQO-da naqtylanǵan bıýdjettiń basym bóligi áleýmettik salaǵa baǵyttalǵan
Sessııa otyrysynda sóz alǵan oblys ákimi J.Túımebaev oblystyń bıýdjet kólemi ótken jylmen salystyrǵanda 25,7 mlrd teńgege ósip, bólingen qarjynyń basym bóligi áleýmettik salaǵa baǵyttalǵanyn atap ótti, dep habarlaıdy óńir basshysynyń baspasóz qyzmeti.
«Bólingen qarjylar esebinen bıyl 20 medıtsınalyq pýnkttiń máselesi sheshiletin bolady. «Órleý» jobasy aıasynda 58 546 az qamtylǵan azamattardy áleýmettik qoldaýǵa qosymsha 1,7 mlrd teńge baǵyttalýda. Sonymen birge, bilim berý nysandarynyń qurylysyna 1 mlrd teńgege jýyq qosymsha qarjy qarastyrylyp otyr. Jalpy aǵymdaǵy jyly 30 mektepti paıdalanýǵa berý josparlanǵan bolsa, búgingi tańǵa 24-niń qurylysy aıaqtaldy. Baspana máselesine de nazar aýdarylǵan. Shymkent qalasynda 2 478 páterli 29 kredıttik turǵyn úıdiń qurylysyn bastaýǵa 2,3 mlrd teńge bólinýde», - dedi aımaq basshysy.
Sonymen qatar, oblys ákimi bıyl 3 avtomatty gaz taratý stantsııasynyń qurylys jumystaryn tolyq aıaqtap, paıdalanýǵa berý josparlanyp jatqanyn ol úshin tıisti qarjylar tolyǵymen qarastyrylǵanyn jetkizdi. Osynyń nátıjesinde, aldaǵy ýaqytta Arys, Kentaý qalalary men Ordabasy, Otyrar aýdandaryndaǵy 137 eldi mekendegi 325 myńǵa jýyq turǵyn tabıǵı gazben qamtamasyz etilmek.
Májiliste 2017-2019 jyldarǵa arnalǵan oblystyq bıýdjetti naqtylaý boıynsha baıandama jasaǵan ekonomıka jáne bıýdjettik josparlaý basqarmasynyń basshysy A.Sabıtov óńir bıýdjetiniń qandaı baǵyttarǵa bólinip jatqanyn atap ótti.
Onyń aıtýynsha, jalpy bólingen qarjynyń 1 mlrd 189 mln teńgesi bilim berýdi damytý jáne bilim berý uıymdaryn kútip-ustaýǵa, al densaýlyq saqtaý uıymdarynyń materıaldyq-tehnıkalyq bazasy men densaýlyq saqtaý salasyn damytýǵa 705,2 mln teńge baǵyttalǵan.
«Aýyl sharýashylyǵy taýar óndirýshideriniń tuqym jáne asyl tuqymdy mal alýǵa ótinimderiniń ulǵaıýyna baılanysty jalpy 1,7 mlrd teńge sýbsıdııa josparlanýda. Injenerlik-kommýnıkatsııalyq ınfraqurylym salasy boıynsha 3 nysannyń qurylysyn jalǵastyrýǵa 443,5 mln teńge qarastyrylýda. Jylýmen qamtamasyz etý salasy boıynsha 1 nysannyń qurylysyn jalǵastyrýǵa 100 mln teńge kózdelýde. Aýyz sýmen qamtamasyz etý boıynsha 4 nysannyń qurylysyn jalǵastyrýǵa jáne 2 nysannyń qurylysyn aıaqtaýǵa 1,2 mlrd teńge, elektrmen qamtamasyz etý boıynsha 13 nysannyń qurylysyn aıaqtaýǵa jáne 1 nysannyń qurylysyn jalǵastyrýǵa 390,9 mln teńge baǵyttalýda. Tabıǵı gazben qamtamasyz etý boıynsha 11 nysannyń qurylysyn jalǵastyrýǵa jáne 3 nysannyń qurylysyn aıaqtaýǵa jalpy 3,1 mlrd teńge josparlanýda. Oblystyq jáne aýdandyq mańyzy bar 6 avtomobıl jolynyń jóndeý jumystaryna jáne 9 nysannyń JSQ-n aıaqtaýǵa 510,3 mln teńge baǵyttalýda», - dedi basqarma basshysy.
