OQO-da «Myrzashól juldyzdary» jeńimpazyna 1 mln teńge berildi
ShYMKENT. QazAqparat - Ońtústik Qazaqstan oblysynda «Myrzashól juldyzdary» atty jas ánshilerdiń óner baıqaýy ótti. Óner saıysy araǵa 23 jyl salyp qaıta uıymdastyryldy, dep habarlaıdy QazAqparat tilshisi.
Oblystyq deńgeıdegi óner baıqaýy Astana qalasynyń 20 jyldyǵy men Maqtaaral aýdanynyń 90 jyldyq mereıtoıyna oraı ótkizildi. Mádenı sharaǵa Ońtústik Qazaqstan oblysynyń ákimi Janseıit Túımebaev pen aqyn-sazger Isarıl Saparbaı, Qazaqstannyń estrada juldyzy Jubanysh Jeksenuly men aýdan turǵyndary qatysyp, keremet keshtiń qurmetti kórermenderi boldy.
Baıqaýdyń ashylýynda sóz alǵan oblys ákimi atalǵan is-sharanyń mańyzdylyǵyna toqtalyp, birqatar aýdan azamattaryn «Oblysqa sińirgen eńbegi úshin» medalimen jáne Alǵys hatpen marapattady.
«Qazaq ánderi - halqymyzdyń baǵa jetpes baılyǵy, sarqylmas qazynasy. Osy qazynamyz jaıynda ataqty óner zertteýshisi Zataevıchtiń ózi joǵary pikir bildirip: «Maǵan kúlli qazaq dalasy án salyp turǵandaı kórinedi» dep atap ketken. Osynaý ulttyq ónerimizdi kózdiń qarashyǵyndaı saqtap, ony dáripteý, alaqanǵa salyp aıalaý - bizdiń basty boryshymyz. Elbasymyz Nursultan Nazarbaev: «Adamzat tarıhynyń kúretamyry - mádenıet. Bul bárimizge belgili aqıqat. Qaı halyqtyń bolmasyn ózge jurtqa uqsamaıtyn bólek bolmys-bitimin daralap, ózindik taǵdyryn aıqyndaıtyn basty belgi - mádenıeti.Sóıtip, tek óziniń ulttyq tól mádenıeti arqyly ǵana basqaǵa tanylady» degen bolatyn. Osyny eskersek, irgesi berik, súıegi myǵym memleket qurýdyń negizgi alǵysharttarynyń biri halyqtyń mádenı-rýhanı turǵydan damýy der edik»,-dedi Janseıit Túımebaev.
Óner dodasyna óńirdiń 20 jas ánshisi qatysyp, baqtaryn synady. Baıqaý qortyndysymen bas júldeni jeńip alǵan maqtaaraldyq Áriphan Nurıslamǵa 1 mıllıon teńge, І orynǵa laıyq dep tanylǵan shymkenttik «Saryn» tobyna ıelendi 500 myń teńge berildi. Al ІІ oryn ıegeri Aınur Aýbakırovaǵa 400 myń teńge tabystalsa, ІІІ júldeli oryn alǵan shardaralyq Jandos Áshirbekov pen túrkistandyq Birjan Saparbekovalarǵa 300 myń teńge kólemindegi qarjylaı syılyq tapsyryldy.
Aıta keteıik, 1993 jyly bastaý alǵan baıqaý el ishinde tanylmaı júrgen kóptegen talanttardy jaryqqa shyǵardy. Alǵashqy óner saıysynyń ózinde-aq bas júldeni enshilegen Jubanysh Jeksenuly erekshe áýezdi únimen eldi tańdaı qaqtyrǵan bolatyn. Ol búginde Qazaqstan Respýblıkasynyń eńbek sińirgen qaıratkeri, qazaq estradasyndaǵy jaryq juldyzdardyń biri. Al kelesi jyly Otyrardan kelip, baǵyn synaǵan Hadısha Shalabaeva bas júldeni jeńip alǵan bolatyn.
