OQO-da mýzeı qyzmetkerleri mádenı murany saqtaý máselelerin talqylady
ShYMKENT. QazAqparat - Ońtústik Qazaqstan oblysy, Otyrar aýdanynda QR Mádenıet jáne sport mınıstrligi, Otyrar memlekettik arheologııalyq qoryq-mýzeıi jáne Rýhanııat - Ábý Násir ál-Farabı mýzeıiniń birlesýimen «Mádenı murany saqtaý jáne qalpyna keltirý máseleleri» respýblıkalyq ǵylymı-tájirıbelik semınar ótti, dep habarlaıdy QazAqparat tilshisi.
Elbasymyz N.Á.Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyrylǵan semınarǵa tarıhshylar, otandyq ǵalymdar men mýzeı isiniń mamandary qatysty. Basqosý mýzeı qoryndaǵy qundy jádigerlermen jáne óńirlik qolóner sheberleriniń buıymdarymen jabdyqtalǵan kórmeden bastaldy. Jıyndy QR Mádenıet jáne sport mınıstrliginiń Mádenıet jáne óner isteri departamenti dırektorynyń orynbasary Ábil Jolamanov ashyp berip, QR Mádenıet jáne sport mınıstri Arystanbek Muhamedıulynyń quttyqtaýyn jetkizdi.
Sonymen qatar, QR Ulttyq murajaıy dırektorynyń orynbasary Dáýletkereı Qusaıynov jáne aýdan ákiminiń orynbasary Ryskeldi Álish Otyrar tarıhyna, tarıh zertteýshileri men mýzeı mamandarynyń eńbekterine, jetken jetistikterine toqtalyp ótti. Jıynda zertteýshi-ǵalymdar mýzeı isinde mamandarmen birlesip, zertteýler júrgizýge jumyldyrý jáne elimizdegi ár óńirlik mýzeılerdiń qorynda saqtaýly qundy muralardyń tarıhyn ashý máselelerin sóz etti. Jádigerlerdiń aımaqtyq erekshelikteri, olardy qalpyna keltirý jumystaryn júrgizýdi qolǵa alý máseleleri qaraldy.
Ulttyq qoljazbalar jáne sırek kitaptar ortalyǵy dırektorynyń orynbasary, fılosofııa ǵylymdarynyń doktory Ámirqul Ábýov Túrkistandaǵy jerasty jolyn ashý týraly usynysyn bildirip, áýlıeligi men keremetteri arqyly kópshilikke tanylǵan tulǵalar jaıly «Rashahat Aın Ál-Haıat» atty kitapty murajaıǵa tabystady. Semınardyń plenarlyq otyrysynda elimizdiń ár túkpirinen kelgen qatysýshylar baıandamalar oqyp, tyń oılaryn ortaǵa saldy. Sondaı-aq mýzeıler salasyndaǵy ózekti máseleleri talqylanyp, qundy jádigerlerdiń jınaqtalýy men tarıhynyń ashylýyna erekshe mán berilip, usynys-pikirlerde aıtyldy.
Jıynnan keıin qonaqtar Arystanbab kesenesi men Otyrar qalajurty oryndaryna baryp, tarıhymen tanysty. Otyrar qoryq - mýzeıiniń restavratsııa jáne konservatsııa bóliminiń qyzmetkerleri «Mýzeılik jádigerler qaıta qalpyna keltirý men saqtaý erejeleri» baǵyty boıynsha óz jumystarymen tanystyryp, «Qoldanbaly ónerdi damytý» sektsııasy barysynda sheberlik sabaǵyn uıymdastyrdy.
«Mýzeı qoryndaǵy jádigerlerdi esepke alýda qoldanylatyn erejeler» taqyrybyndaǵy sońǵy sektsııa boıynsha qor saqtaý bóliminiń qyzmetkerleri jádigerlerdi saqtaý qoımalarymen jáne esepke alý, tirkeý qujattarymen tanystyryp, tájirıbe almasty.
«Qazaqstannyń kıeli jerleriniń geografııasy» jobasy aıasynda Áziret Sultan, Gaýhar ana, Úkashata kesenelerine saıahat jasady.
