OQO-da múmkindigi shekteýli jandar tegin taksımen júredi
ShYMKENT. QazAqparat - Ońtústik Qazaqstan oblysynyń Qazyǵurt aýdanynda múmkindigi shekteýli jandar úshin tegin taksı qyzmeti iske qosyldy, dep habarlaıdy QazAqparat tilshisi.
Atalǵan aýdanda 100-den astam múmkindigi shekteýli jan bar. Olardyń baratyn jerine jetip turýyna aýdan ákimdigi qazynasynan úsh jarym mıllıon teńge bólindi. Táýlik boıy qyzmet kórsetetin ınvataksı ázirge bireý ǵana. Sonyń ózine jarymjan jandardy qýantyp otyr.
«Ózdiginen júrip-tura almaıtyn bizder úshin dittegen jerge jetý muńǵa aınalady. Ásirese, em-dom jasatý úshin aýrýhanaǵa baratyn kezde qatty qınalatynbyz. Endi bul qıyndyq artta qaldy. Baratyn jerimizge aparyp keletin taksı shyqty», - deıdi birinshi toptaǵy múgedek Ánýarbek Mýsabaev.
Invataksı qyzmetine júginý úshin múgedekter aldyn ala habarlasyp, ótinish beredi. Operatorlar málimetter bazasyna onyń aty-jónin, mekenjaıyn jáne ýaqytyn tirkep qoıady. Búginde dıspetcherlik bólimshege kún saıyn osyndaı ondaǵan qońyraý kelip túsýde. Sondyqtan sala basshylary aldaǵy ýaqytta kólikterdiń sanyn arttyrýdy kózdep otyr.
Jalpy, bıyl aýdanda muqtaj jandarǵa 62 qol arba úlestirildi. Múmkindigi shekteýli jandarǵa kedergisiz keleshek qalyptastyrý úshin áli birqatar sharýa atqarylýy tıis. Sondaı-aq, jeke ońaltý baǵdarlamasy boıynsha múgedekter mindetti gıgıenalyq zattarmen qamtamasyz etilýde. Bul baǵytta bıýdjetten 50 mln teńge qarastyryldy.
