OQO-da muǵalimder eńbek ınspektsııasyna kóp shaǵymdanady
ShYMKENT. QazAqparat - Túrkistanda muǵalimder sabaq berýdiń ornyna ózara daýlasyp júrgen. Bul týraly oblystyq eńbek ınspektsııasy jónindegi basqarma mamandary málimdedi, dep habarlaıdy QazAqparat tilshisi.
Jergilikti eńbek ınspektorlary men túrli sala qyzmetkerleriniń basyn qosqan jıynda eńbek qatynasy barysyndaǵy kelispeýshilikter ashyq aıtylyp, kópshilik talqysyna tústi.
Sala mamandarynyń málimetinshe, eńbek ınspektsııasyna túsken ótinishterdiń ishinde 47 ótinish túrli sala boıynsha tússe, onyń 19-y bilim salasyna qatysty bolyp otyr. Taǵy 29 ótinish jalaqyǵa qatysy bar ekeni anyqtalǵan. Eńbek daýlaryna qatysty túsken 60 aryz-ótinishtiń 48-i osy bıýdjettik mekemelerge tıesili ekeni aıtyldy.
«Eńbek ınspektsııasyna aryzdanýshylar aldymen sol mekteptiń ne bolmasa balabaqshanyń basshysyna baryp máselesin kóteredi. Alaıda ol mekemeniń basshysy máselege nemquraıly qaraǵandyqtan aýdandyq bilim bólimine keledi. Ol jerde de jańaǵy máselege nemquraıly qarap, túsindirme jumystary júrgizilmegendikten bizdiń oblystyq eńbek ınspektsııasyna keledi», - deıdi basqarma basshysy Almasbek Mamytbekov.
Jyl basynan beri ınspektsııa qyzmetkerleri Túrkistan qalasy boıynsha 51 tekserý sharasyn júrgizipti. Onyń ishinde 27-si turǵyndardyń aryz-shaǵymy boıynsha taǵaıyndalǵan. Inspektorlardyń aıtýynsha, jergilikti turǵyndardy jumyspen qamtý men bos jumys oryndaryna shaqyrý isinde de shıkilik kóp. Bul baǵytta 16 zańbuzýshylyq anyqtalyp, olar boıynsha tıisti sharalar kórilgen.
