OQO-da «Mızam» ulttyq merekesi toılandy
ShYMKENT. QazAqparat - Ońtústik Qazaqstan oblysynda «Mızam» ulttyq merekesi toılandy. Ádet-ǵuryp jáne salt-dástúr ortalyǵy men Saıram aýdandyq mádenıet jáne tilderdi damytý bóliminiń uıymdastyrýymen ótken sharada kóne dástúrge saı qysqa daıyndyq barysy kórsetildi, dep habarlaıdy QazAqparat tilshisi.
Qazaqtyń ómir saltynda bar «Mızam» ulttyq merekesi halyq arasynda umyt bolyp barady. Sondyqtan uıymdastyrýshylar mal semirip, egin orylyp, shóp shabylyp, eldiń berekege keńeletin kezinde atap ótiletin bul sharany keńinen nasıhattaýdy maqsat tutty. Umytyla bastaǵan osy dástúrdiń kóne dástúrge saı nusqasyn telearna men ózge de BAQ arqyly el arasyna taratýdi kózdedi.
Festıvaldin ashylýynda sóz alǵan Ádet-ǵuryp jáne salt-dástúr ortalyǵynyń dırektory Jánibek Taǵaev ıgi sharanyń mańyzy erekshe ekendigine toqtalyp, aldaǵy ýaqytta da óz jalǵasyn tabatynyn jetkizdi. Festıvalde Saıram aýdany turǵyndarynyń kóne dástúrge saı qysqa daıyndyq barysy kórsetildi. Kúzeý men qarynǵa maı saqtaý, et súrleý kópshilik aldynda jasaldy. Sondaı-aq, dıqandar men baǵbandardyń jınaǵan ónimderi jınalǵan jurtshylyqtyń nazaryna usynyldy.
Budan bólek, «Mızam» merekesine tuspa-tus kelgen «Sirge jııar» (Sirge móldireter) dástúrinen kórinis kórsetildi. Іs-shara sońynda ortalyq dırektory Jánibek Taǵaev atalǵan sharaǵa joǵary baǵa berip, uıymdastyrýǵa úlesin qosqan ónerpazdar men ujymdarǵa arnaıy alǵys hat pen syı-sııapattar jasady. 
