OQO-da meıirbıkelerdiń arqasynda ana ólimi 47 protsentke azaıdy
ShYMKENT. QazAqparat - Ońtústik Qazaqstan oblysynda Halyqaralyq meıirbıkeler kúnine arnalǵan merekelik is-shara ótip, orta býyn medıtsına qyzmetkerleri marapattaldy, dep habarlaıdy QazAqparat HAA tilshisi.
Saltanatty sharada oblystyq Densaýlyq saqtaý basqarmasynyń basshysy Muqan Egizbaev quttyqtaý sóz sóılep, atqarylǵan jumystarǵa toqtaldy.
Basqarma bashysynyń sózinshe, jyl saıyn oblys turǵyndarynyń 438 myńy aýrýhanada em alady. Árbir azamat jylyna kem degende 4 retten emhanaǵa qaralady. Al, jedel járdem kómegine 1 mıllıonnan astam adam júginedi. Turǵyndaryna kórsetiletin osyndaı medıtsınalyq kómek túrleriniń qashan da sapaly bolýyna oblys boıynsha 22 myńnan astam meıirbıke qomaqty úles qosyp keledi.
«Kún-tún demeı, qaı ýaqytta bolsa da alǵashqy medıtsınalyq kómek kórsetýge daıyn turatyn meıirbıkelerdiń syrqattanyp kelgen turǵyndardyń saýyǵyp ketýine qosyp jatqan úlesi óte úlken. Orta býyndy medıtsına mamandarynyń kómegimen oblysta bıylǵy birinshi toqsannyń qorytyndysynda ana ólimi 47 paıyzǵa, bala ólimi 18 paıyzǵa azaıdy, - deıdi Muqan Egizbaev.
Merekelik sharada birqatar meıirbıkelerge «Oblysqa sińirgen eńbegi úshin» medaldary, oblys ákiminiń Qurmet gramotalary men Alǵys hattary tabystaldy. Jyl kóleminde nátıjeli jumys atqarǵan mamandar oblystyq máslıhattyń Alǵys hattarymen, «Nur Otan» partııasynyń gramotalarymen marapattaldy. Olardyń qataryn QR Densaýlyq saqtaý mınıstrliginiń «Densaýlyq saqtaý isiniń úzdigi» tósbelgisimen jáne mınıstrliktiń Qurmet gramotalarymen, OQO Densaýlyq saqtaý basqarmasynyń qurmet gramotalarymen, «Kásipodaqqa sińirgen eńbegi úshin» tósbelgisimen, Qazaqstandyq densaýlyq saqtaý qyzmetkerleriniń salalyq kásipodaǵynyń Qurmet gramotalarymen marapattalǵan meıirbıkeler tolyqtyrdy.
Jyl saıyn mereke qarsańynda ótetin medıtsına mamandary arasynda eń úzdikterdi tańdaý saıysy bıyl da jalǵasyn tapty. Dástúrli baıqaýdyń jeńimpazdary 2017 jyldyń úzdik mamandary arnaıy dıplomdarymen jáne baǵaly syılyqtarmen marapattaldy. Bulardan bólek saıysqa qatysqan 30 medıtsına mamanyna «Aqsý-Jabaǵyly», «Birkólik» jáne «Densaýlyq» shıpajaıylaryna joldamalar tabys etildi.
Aıta keteıik, jyldan jylǵa óńirdiń densaýlyq saqtaý salasyna tıisti deńgeıde kóńil bólinip keledi. Kún saıyn medıtsınalyq mekemeler jańaryp, jańa ǵımarattar el ıgiligine berilip jatyr. Mamandar tapshylyǵy azaıyp, medıtsına qyzmetkerleriniń biliktiligin udaıy arttyrý jolǵa qoıylǵan. Bıyl bıýdjet esebinen jyl saıyn 6 myńnan astam medıtsına mamandarynyń bilimderin jetildiredi. Densaýlyq saqtaý salasyndaǵy atqarylǵan júıeli jumystardyń nátıjesinde oblys turǵyndarynyń ortasha ómir súrý jasy 71,9-ǵa ulǵaıǵan.
