OQO-da «Mereıli otbasy» baıqaýynyń jeńimpazdary anyqtaldy
ShYMKENT. QazAqparat - Ońtústik Qazaqstan oblysynda «Mereıli otbasy» baıqaýynyń jeńimpazdary anyqtaldy. Oblystyq ishki saıasat basqarmasy uıymdastyrǵan sharaǵa qala-aýdandardan 30 januıa qatysty, dep habarlaıdy QazAqparat HAA tilshisi.
Úsh kezeńnen turatyn (aýdandyq, oblystyq, respýblıkalyq) baıqaýǵa 322 januıa qatysýǵa tilek bildirgen. Al, jeńimpaz bolyp Shymkenttik Kanalbaı Seıilbekuly men Ordabasy aýdanynan kelgen Omash Shapaevtyń januıalary tanyldy. Qos januıaǵa Astana qalasynda ótetin respýblıkalyq baıqaýǵa joldama berildi. Odan bólek 28 otbasyǵa baǵaly syılyqtar men oblys ákiminiń alǵys haty tabystaldy. Sharaǵa qatysqan oblys ákiminiń orynbasary Ulasbek Sádibekov óńir basshysy Janseıit Qanseıitulynyń quttyqtaýyn jetkizdi.
«Óńirde 4-ret uıymdastyrylyp otyrǵan baıqaýdyń maqsatyn ózderińiz jaqsy túsinip otyrsyzdar. Elbasynyń ózi bastap, bul baıqaýǵa ulttyq dárejedegi ataq berilýiniń ózi ulttyq otbasylyq qundylyqtardy dáripteýdiń mańyzyn aıshyqtaı túsedi. «Otan otbasynan bastalady» dep jatady. Eger otbasynda bereke bolsa, otbasynda yntymaq bolsatyn bolsa, onda bizdiń ortaq otanymyz Qazaqstanda yntymaq, Qazaqstanda bereke bolady» dedi Ulasbek Sádibekuly.
Aıta keteıik, bul baıqaýǵa degen jurttyń qyzyǵýshylyǵy jyldan jylǵa artyp keledi. Byltyr oblystan 294 otbasy qatysqan bolsa, bıyl qatysýǵa tilek bildirgen januıalardyń sany 300-den asyp otyr.
